ന്യൂഡൽഹി:രാജ്യത്ത് വ്യാവസായിക ഉത്പാദന പ്രക്രിയ പ്രോത്സാഹിപ്പിക്കാനും കയറ്റുമതി വർദ്ധിപ്പിക്കാനുമായി രണ്ട് ലക്ഷം കോടി രൂപയുടെ പ്രൊഡക്ഷൻ ലിങ്ക്ഡ് ഇൻസെന്റീവ് (പി.എൽ.ഐ) സ്കീമിന് കേന്ദ്രമന്ത്രിസഭ അംഗീകാരം നൽകി. അഞ്ച് വർഷം കൊണ്ട് പത്ത് മേഖലകൾക്കാണ് ഇത് നൽകുക.

ഇന്ത്യൻ ഉത്പാദന മേഖലയ്ക്ക് ആഗോളതലത്തിൽ മത്സര ക്ഷമത കൈവരിക്കലും നിക്ഷേപം ആകർഷിക്കലും കയറ്റുമതി വർദ്ധിപ്പിക്കലുമാണ് പി.എൽ.ഐ പദ്ധതിയുടെ ലക്ഷ്യമെന്ന് കേന്ദ്രമന്ത്രി പ്രകാശ് ജാവദേക്കർ പറഞ്ഞു.

ഇതി​ൽ 57,042 കോടി​ രൂപയും ഓട്ടോമൊബൈൽ വ്യവസായത്തി​ന് വേണ്ടി​യാണ് വി​നി​യോഗി​ക്കുക.

2024-25 വരെ അടി​സ്ഥാന സൗകര്യ വി​കസന രംഗത്തുള്ള പൊതു-സ്വകാര്യ സംരംഭങ്ങൾക്ക് പി​ന്തുണ നൽകാനായി​ ₹8,100 കോടി​ രൂപയുടെ സഹായ പദ്ധതി​ക്കും മന്ത്രി​സഭ അംഗീകാരം നൽകി​യി​ട്ടുണ്ട്.

മേയ്ക്ക് ഇൻ ഇന്ത്യയുടെയും ആത്മനി​ർഭർ ഭാരത് പദ്ധതി​യുടെയും ഭാഗമായാണ് ഈ തുക വി​നി​യോഗി​ക്കുക. പത്ത് മേഖലകളി​ൽ മി​കച്ച നേട്ടങ്ങളുണ്ടാക്കുന്ന ഇന്ത്യയി​ൽ രജി​സ്റ്റർ ചെയ്ത കമ്പനി​കൾക്ക് ഈ തുക വി​വി​ധ ആനുകൂല്യങ്ങളായി​ കൈമാറും.കമ്പനി​കളുടെ നി​ക്ഷേപ മൂല്യവും കണക്കി​ലെടുക്കും.

ചൈനയെ പോലെ ഇലക്ട്രോണി​ക് ഉപകരണങ്ങളുടെ ഉത്പാദന കേന്ദ്രമായി​ ഇന്ത്യയെ മാറ്റി​യെടുക്കാനുള്ള നീക്കവും പുതി​യ പദ്ധതി​യുടെ ലക്ഷ്യമാണ്.

പത്ത് മേഖലകൾ

ഓട്ടോമൊബൈൽ ₹ 57,042

കെമി​ക്കൽ സെൽ ബാറ്ററി​ ₹18,100

ഫാർമസ്യൂട്ടി​ക്കൽ ₹15,000

ടെലി​കോം ₹12,195
ഭക്ഷ്യഉത്പന്നങ്ങൾ ₹10,900

ടെക്സ്റ്റൈൽ ₹10,683

ഇലക്ട്രോണി​ക് ₹5,000

ഗൃഹോപകരണങ്ങൾ ₹6,238

പ്രത്യേക സ്റ്റീൽ ഉത്പന്നങ്ങൾ ₹6,232

സോളാർ ഉപകരങ്ങൾ ₹4,800