ആലുവ: കോമ്പാറയിലെ മരിയ ക്ലിനിക്കിൽ രണ്ട് മാസമായി​ ചി​കി​ത്സ നടത്തി​വന്ന വ്യാജ വനിത ഡോക്ടർ പത്തനംതിട്ട റാന്നി വടാശ്ശേരി ചെറുപുളഞ്ഞി ശ്രീഭവനിൽ സംഗീത ബാലകൃഷ്ണൻ (45) പൊലീസ് പിടിയിലായി.

ജില്ലാ പൊലീസ് മേധാവി കെ. കാർത്തിക്കിന് ലഭിച്ച രഹസ്യവിവരത്തിൻറെ അടിസ്ഥാനത്തിൽ നടത്തിയ പരിശോധനയിലാണ് കുടുങ്ങി​യത്. പൊലീസ് പരിശോധനക്കെത്തുമ്പോൾ സംഗീത രോഗികളെ പരിശോധിക്കുകയായിരുന്നു. രജിസ്‌ടേഷൻ സർട്ടിഫിക്കറ്റുകൾ വ്യാജമാണെന്ന് തെളിഞ്ഞു. ഫാർമസി ഡിപ്ലോമ സർട്ടിഫിക്കറ്റ് മാത്രമാണ് ഇവർക്കുള്ളതെന്നും പൊലീസിനോട് സമ്മതിച്ചു.

എടത്തല പൊലീസ് ഇൻസ്‌പെക്ടർ പി.ജെ. നോബിളിന്റെ നേതൃത്വത്തിൽ അന്വേഷണം ആരംഭിച്ചു. കൊവിഡ് പരിശോധനക്ക് ശേഷം ഇവരെ കോടതിയിൽ ഹാജരാക്കി. വരും ദിവസങ്ങളിൽ കൂടുതൽ പരിശോധനകൾ നടത്തുമെന്ന് എസ്.പി കെ. കാർത്തിക് പറഞ്ഞു.