കൊച്ചി: കടയടപ്പിക്കാൻ ആരും ഇങ്ങോട്ട് വരില്ല കടയടച്ചാൽ വോട്ട് പോകും. കട അടപ്പിക്കാൻ വരുന്ന രാഷ്ട്രീയ പാർട്ടിക്ക് എന്റെയും കുടുംബത്തിന്റെയും വോട്ടില്ല ഇത് വെറും വാക്കല്ല. ബോർഡെഴുതി കടയ്ക്ക് മുന്നിൽ തൂക്കിയിരിക്കുകയാണ് ഇടപ്പള്ളി ചങ്ങമ്പുഴ പാർക്കിന് സമീപം പലചരക്ക് കട നടത്തുന്ന വേണുവർമ്മ. കേന്ദ്ര സർക്കാരിന്റെതൊഴിൽ വിരുദ്ധ നയങ്ങൾക്കെതിരെ നടക്കുന്ന ദേശീയ പണിമുടക്കിൽ കടയടക്കുന്നതിലുള്ള പ്രതിഷേധം അറിയിച്ചാണ് ഈ ബോർഡ്. കൊവിഡ് വ്യാപനത്തെതുടർന്ന് മാസങ്ങളായി പ്രതിസന്ധി അനുഭവിക്കുന്നതിനിടയിൽ കടയടച്ചുള്ള പ്രതിഷേധത്തോട് യോജിക്കാൻ കഴിയില്ലെന്ന് വേണുവർമ്മ പറയുന്നു. ഏത് രാഷ്ട്രിയ പാർട്ടി നടത്തിയാലും അതിനോട് യോജിക്കാൻ കഴിയില്ലെന്നും എല്ലാവരും പ്രതികരിക്കണമെന്നും പറയുന്നു. ലോക്ക് ഡൗണിൽ പല ചരക്ക് കടകളുടെ കച്ചവടത്തെ കാര്യമായി ബാധിച്ചില്ലെങ്കിലും മറ്റ് നിരവധി മേഘലകളിൽ ജോലിചെയ്യുന്നവർക്ക് വരുമാനം നിലച്ചു. കടയ്ക്ക് മുന്നിൽ തൂക്കിയിരിക്കുന്ന ഈ ബോർഡ് കണ്ട് നിരവധി പേരാണ് മൊബൈലിൽ ചിത്രങ്ങൾ എടുത്ത് മടങ്ങുന്നത്.