തൊടുപുഴ: ജില്ലയിലെ ഭൂമിസംബന്ധമായ വിഷയങ്ങളിൽ പരിഹാരമാവശ്യപ്പെട്ട് കേരള വ്യാപാരി വ്യവസായി ഏകോപനസമിതി തൊടുപുഴ ബ്ലോക്ക് കമ്മറ്റിയുടെ ആഭിമുഖ്യത്തിൽ സിവിൽ സ്റ്റേഷനുമുന്നിൽ ഏകദിന ഉപവാസ സമരം നടത്തി. 1964 ലേയും 1993 ലേയും ഭൂപതിവുചട്ടങ്ങൾ ഭേദഗതി ചെയ്യുക, നിർമ്മാണ നരോധന ഉത്തരവുകൾ പിൻവലിക്കുക, ജില്ലയിലെ ഷോപ്പ് സൈറ്റുകൾക്ക് പട്ടയം നൽകുക, കർഷക വ്യാപാര ദ്രോഹ നടപടികൾ അവസാനിപ്പിക്കുക, സർവ്വകക്ഷിയോഗ തീരുമാനങ്ങൾ നടപ്പിലാക്കുക മുതലായ ആവശ്യങ്ങൾ ഉന്നയിച്ചാണ് ഉപവാസസമരം നടത്തിയത്. വ്യാപാരിവ്യവസായി ഏകോപനസമിതി ജില്ലാ പ്രസിഡന്റ് കെ.എൻ. ദിവാകരൻ സമരം ഉദ്ഘാടനം ചെയ്തു. ബ്ലോക്ക് പ്രസിഡന്റ് എൻ.പി. ചാക്കോ അദ്ധ്യക്ഷനായിരുന്നു.
ജില്ലാ ജനറൽ സെക്രട്ടറി കെ.പി. ഹസ്സൻ, വൈസ് പ്രസിഡന്റുമാരായ സി.കെ. മോഹനൻ, സുബൈർ എസ്. മുഹമ്മദ്, സെക്രട്ടറിമാരായ പി.എം. ബേബി, തങ്കച്ചൻ കോട്ടക്കകത്ത്, ജോസ് വഴുതനപ്പിള്ളിൽ, വിവിധ യൂണിറ്റു ഭാരവാഹികൾ തുടങ്ങിയവർ പ്രസംഗിച്ചു. വൈകിട്ട് നടന്ന സമാപനസമ്മേളനം ജില്ലാ ട്രഷറർ സണ്ണി പൈമ്പിള്ളിൽ ഉദ്ഘാടനം ചെയ്തു. ജില്ലാ സെക്രട്ടറി ആർ. രമേഷ് സ്വാഗതവും, ബേബി കൊറ്റാഞ്ചേരിൽ നന്ദിയും പറഞ്ഞു. ഉപവാസം അനുഷ്ഠിച്ച എൻ.പി. ചാക്കോ, ആർ. രമേഷ്, തോമസ് കുരുവിള എന്നിവർക്ക് നാരാങ്ങാനീരു നല്കി വൈകിട്ട് സമരത്തിന് സമാപനം കുറിച്ചു.