ചെറുതോണി: വാഴത്തോപ്പ് മൃഗാശുപത്രിയുടെ വാതിൽ തകർത്ത്‌ മോഷണം. ആശുപത്രിയിൽ സൂക്ഷിച്ചിരുന്ന 5700 രൂപയോളം നഷ്ടമായി. ഇന്നലെ രാവിലെ ആശുപത്രിയിലെത്തിയ ജീവനക്കാരാണ് മോഷണം നടന്ന വിവരം ആദ്യം അറിഞ്ഞത്. ഇതേ തുടർന്ന് ഡോക്ടർ ഇടുക്കി പൊലീസിൽ വിവരം അറിയിക്കുകയായിരുന്നു. ആശുപത്രിയിൽ കഴിഞ്ഞ ദിവസങ്ങളിൽ പഞ്ചായത്ത് വ്യക്തിഗത ആനുകൂല്യത്തിൽപെടുത്തി കോഴിക്കുഞ്ഞുങ്ങൾ വിതരണം ചെയ്യുന്നതിനായി ഒരാളിൽ നിന്ന് 300 രൂപ നിരക്കിൽ ഗുണഭോക്തൃവിഹിതം വാങ്ങിയിരുന്നു. ഈ തുക ആശുപത്രിയിൽ സൂക്ഷിച്ചിരിപ്പുണ്ടാകുമെന്ന ധാരണയിലാകാം മോഷണമെന്ന് കരുതുന്നു. ഇടുക്കി പൊലീസും ഫിങ്കർപ്രിന്റ് വിദഗ്ദ്ധരും ഡോഗ് സ്‌ക്വാഡും സ്ഥലത്തെത്തി പരിശോധന നടത്തി. കേസ് രജിസ്റ്റർ ചെയ്ത് പ്രതിക്കായി പൊലീസ് അന്വേഷണം ആരംഭിച്ചു.