കണ്ണൂർ: മയ്യഴി പുഴയോരത്ത് ജില്ലാ പഞ്ചായത്തിന്റെ നേതൃത്വത്തിൽ കുട്ടികൾക്കും വയോജനങ്ങൾക്കുമായി നിർമ്മിച്ച പാർക്ക് മയ്യഴിയുടെ കഥാകാരൻ എം. മുകുന്ദന്റെ നാമത്തിൽ അറിയപ്പെടും. ന്യൂമാഹി പാർക്കിന് എം. മുകുന്ദന്റെ നാമം നൽകാൻ പ്രസിഡന്റ് കെ.വി സുമേഷിന്റെ അദ്ധ്യക്ഷതയിൽ ഇന്നലെ ചേർന്ന ജില്ലാ പഞ്ചായത്ത് യോഗം തീരുമാനിച്ചു. മലയാള സാഹിത്യത്തിന് നൽകിയ സംഭാവനകൾക്കുള്ള ആദരമായാണ് ഇത്.

പാർക്കിന്റെ ഉദ്ഘാടന വേളയിൽ വ്യവസായ വകുപ്പ് മന്ത്രി ഇ.പി ജയരാജനാണ് എം. മുകുന്ദൻ മലയാള സാഹിത്യത്തിന് നൽകിയ സംഭാവനകൾ പരിഗണിച്ച് പാർക്കിന് അദ്ദേഹത്തിന്റെ പേര് നൽകാൻ നിർദ്ദേശിച്ചത്.

അഞ്ച് വർഷം പൂർത്തിയാക്കുന്ന ജില്ലാ പഞ്ചായത്തിന്റെ അവസാന യോഗമാണ് ബുധനാഴ്ച നടന്നത്. അഞ്ച് വർഷം ജില്ലയുടെ വികസനത്തിനുവേണ്ടി രാഷ്ട്രീയ അഭിപ്രായ വ്യത്യാസങ്ങൾ മറന്ന് ഒന്നിച്ചു നിൽക്കാൻ കഴിഞ്ഞതിന്റെ സന്തോഷം അംഗങ്ങൾ പങ്കിട്ടു. വികസനത്തിനായി എല്ലാവരെയും കോർത്തിണക്കി ഐക്യത്തോടെ പ്രവർത്തിക്കാൻ കഴിഞ്ഞതാണ് മാതൃകാപരമായ ഒട്ടേറെ പദ്ധതികൾ നടപ്പിലാക്കാൻ സഹായകമായതെന്ന് പ്രസിഡന്റ് കെ.വി സുമേഷ് പറഞ്ഞു. വിയോജിപ്പുകൾ പരസ്പരം ഉയർത്തേണ്ടി വന്നിട്ടുണ്ടെങ്കിലും വികസന പദ്ധതികളുടെ കാര്യത്തിൽ യോജിച്ചു പ്രവർത്തിക്കാനായെന്ന് കോൺഗ്രസ് നേതാവ് തോമസ് വർഗീസ്, മുസ്ലിംലീഗ് പ്രതിനിധി അൻസാരി തില്ലങ്കേരി എന്നിവർ പറഞ്ഞു. വൈസ് പ്രസിഡന്റ് പി.പി ദിവ്യ, സ്ഥിരം സമിതി അദ്ധ്യക്ഷൻമാരായ കെ.പി ജയബാലൻ, വി.കെ സുരേഷ്ബാബു, കെ. ശോഭ, ടി.ടി റംല, സെക്രട്ടറി വി. ചന്ദ്രൻ സംസാരിച്ചു. യുവജന ക്ഷേമ ബോർഡ് വൈസ് ചെയർമാൻ പി. ബിജുവിന്റെ ആകസ്മിക നിര്യാണത്തിൽ യോഗം അനുശോചിച്ചു.