കൽപ്പറ്റ: തദ്ദേശ സ്വയംഭരണ സ്ഥാപന തിരഞ്ഞെടുപ്പിൽ യു.ഡി.എഫ് ജില്ലാ പഞ്ചായത്ത് ഡിവിഷൻ വിഭജനം പൂർത്തിയായതായി ചെയർമാൻ പി.പി.എ കരീം, കൺവീനർ എൻ.ഡി അപ്പച്ചൻ എന്നിവർ അറിയിച്ചു. ആകെയുള്ള പതിനാറ് ഡിവിഷനുകളിൽ കോൺഗ്രസ് പത്തും, മുസ്ലിംലീഗ് അഞ്ചും, കേരളാ കോൺഗ്രസ് ഒരു ഡിവിഷനിലും മത്സരിക്കും. പുൽപ്പള്ളി, മുള്ളൻകൊല്ലി, മുട്ടിൽ, അമ്പലവയൽ, ചീരാൽ, പൊഴുതന, തോമാട്ടുചാൽ, തവിഞ്ഞാൽ, തിരുനെല്ലി, എടവക ഡിവിഷനുകളിൽ കോൺഗ്രസ് മത്സരിക്കും. വെളളമുണ്ട, പടിഞ്ഞാറത്തറ, കണിയാമ്പറ്റ, പനമരം, മേപ്പാടി ഡിവിഷനുകളിൽ മുസ്ലിംലീഗും, മീനങ്ങാടി ഡിവിഷനിൽ കേരളാ കോൺഗ്രസും മത്സരിക്കും. ജില്ലയിലെ മുഴുവൻ ഗ്രാമപഞ്ചായത്തുകളിലേയും സീറ്റു വിഭജനം പൂർത്തിയായി. ബ്ലോക്ക് പഞ്ചായത്തുകളിലേത് പൂർത്തിയായി വരുന്നതായും യു.ഡി.എഫ് നേതാക്കൾ അറിയിച്ചു.