കറുകച്ചാൽ: മനസിന്റെ കരുത്താണ് പ്രധാനം. ശരീരം അതിനു പിന്നാലെ വരും എന്ന വിശ്വാസക്കാരനാണ് സിബിച്ചൻ. അതുകൊണ്ടുതന്നെ ശാരീരിക വെല്ലുവിളികളെ അവഗണിച്ച് ത്രിതല പഞ്ചായത്ത് തിരഞ്ഞെടുപ്പിൽ ജനവിധി തേടുകയാണ് കൂത്രപ്പള്ളി തുണ്ടിയിൽ സിബിച്ചൻ എന്നറിയപ്പെടുന്ന ജിമ്മി ജോസഫ് (54). വാഴൂർ ബ്ലോക്ക് പഞ്ചായത്തിലേക്ക് കൂത്രപ്പള്ളി ഡിവിഷനിൽ നിന്ന് എൽ.ഡി.എഫ്. സ്ഥാനാർത്ഥിയായാണ് മത്സരിക്കുന്നത്.

ജന്മനാ കൈകാലുകൾക്ക് സ്വാധീനമില്ലാത്ത സിബിച്ചൻ തന്റെ പരിമിതികളോട് പടവെട്ടിയാണ് ജീവിക്കുന്നത്. ശാരീരിക ബുദ്ധിമുട്ടുള്ളതിനാൽ മറ്റ് ജോലികൾ ചെയ്യാൻ സാധിക്കില്ല. വീട് നിർമാണം കരാറെടുത്ത് നടത്തുന്നതാണ് വരുമാന മാർഗം. 25 വർഷത്തോളമായി കേരളാ കോൺഗ്രസിന്റെ സജീവ പ്രവർത്തകനാണ്. പാർട്ടി പിളർന്നപ്പോൾ ജോസ് വിഭാഗത്തിൽ നിലകൊണ്ടു. കഴിഞ്ഞ തവണ പഞ്ചായത്ത് തിരഞ്ഞെടുപ്പിൽ മത്സരിക്കാനൊരുങ്ങിയെങ്കിലും പാർട്ടി നിർദേശത്തെ തുടർന്ന് പിൻവാങ്ങി. സുഹൃത്തുക്കളുടെയും സഹപ്രവർത്തകരുടെയും സഹായത്തോടെയാണ് പ്രചാരണം . വർഷങ്ങളായി തന്നെ അറിയുന്ന ജനങ്ങൾ പൂർണ പിന്തുണ നൽകുമെന്ന വിശ്വാസത്തിലാണ് ഇദ്ദേഹം.