കോട്ടയം: ഗൂഗിൾ മാപ്പ് നോക്കി ചങ്ങനാശേരിക്ക് പോയ വണ്ടി ചെന്നുപെട്ടത് നഗരത്തിൽ കെ.എസ്.ആർ.ടി.സിക്ക് സമീപത്തെ തിയേറ്റർ റോഡിലേയ്ക്ക്. ഒാടിച്ചെന്നതോടെ റോഡ് നിലച്ചു പോയി. ഇതു കണ്ട് പിന്നോട്ടെടുത്ത ഭാര വണ്ടി തിരിക്കാൻ ശ്രമിക്കവെ തിട്ടയിൽ തട്ടി മറിഞ്ഞു.

ഇന്നലെ വൈകിട്ടോടെയായിരുന്നു സംഭവം.

നിർമാണ സാമഗ്രികളുമായി വന്ന ചെറുവാനിനാണ് ഗൂഗിൾ മാപ്പ് പണി കൊടുത്തത്. കെ.എസ്.ആർ.ടി.സി സ്റ്റാൻഡിന് വലത്തേയ്ക്ക് തിരിയുന്ന ചെറിയ വഴിയിലൂടെ വേഗം കോടിമതയിലേയ്ക്ക് പോകാം. എന്നാൽ തിയേറ്റർ കഴിഞ്ഞാൽ പിന്നെ ഈ ഭാഗത്ത് നടകൾ മാത്രമേയുള്ളൂ. ഗൂഗിൾ മാപ്പിൽ വഴി അടയാളപ്പെടുത്തിയിരിക്കുന്നത് ഈ റോഡാണ്. മുന്നോട്ട് പോയെങ്കിലും മുന്നിൽ വഴി തീർന്ന് നടകൾ കണ്ടതോടെ ഡ്രൈവർ വണ്ടി നിറുത്തി പിന്നിലേയ്ക്ക് എടുക്കുമ്പോഴാണ് തലകീഴായി മറിഞ്ഞത്. നിസാര പരിക്കേറ്റ ഡ്രൈവറെ ആശുപത്രിയിൽ പ്രവേശിപ്പിച്ചു.