ന്യൂഡൽഹി: ഇന്ത്യയിൽ കൊവിഡ് ബാധിതരുടെ എണ്ണം 81 ലക്ഷം പിന്നിട്ടു. കഴിഞ്ഞ 24 മണിക്കൂറിനിടെ 46,963 പേർക്കാണ് പുതുതായി രോഗം സ്ഥിരീകരിച്ചത്. വൈറസ് ബാധ മൂലം ഇന്നലെ മാത്രം 470 പേർ മരിച്ചതായി കേന്ദ്ര ആരോഗ്യ മന്ത്രാലയം അറിയിച്ചു. ഇതോടെ ആകെ മരണസംഖ്യ 1.22 ലക്ഷം ആയി ഉയർന്നു.

ഇതുവരെ 71.91 ലക്ഷം പേർ രോഗമുക്തി നേടി. 91.5 ശതമാനമാണ് രാജ്യത്തെ രോഗമുക്തി നിരക്ക്. സെപ്തംബർ മുതൽ പ്രതിദിന രോഗികളുടെ എണ്ണത്തിൽ കുറവുണ്ടായെങ്കിലും, ഉത്സവ കാലമായ നവംബറിൽ രോഗികളുടെ എണ്ണം കൂടിയേക്കാമെന്ന് വിദഗ്ദ്ധർ മുന്നറിയിപ്പ് നൽകുന്നു.

ഇന്നലെ കേരളത്തിലാണ് ഏറ്റവും കൂടുതൽ കേസുകൾ റിപ്പോർട്ട് ചെയ്തത്. കഴിഞ്ഞ ദിവസം 7,983 പേർക്കാണ് പുതുതായി കൊവിഡ് സ്ഥിരീകരിച്ചത്. ഇതോടെ ആകെ രോഗബാധിതരുടെ എണ്ണം 4.20 ലക്ഷം കടന്നു. ഇന്നലെ 27 മരണങ്ങളും റിപ്പോർട്ട് ചെയ്തു.

ഡൽഹിയിൽ വീണ്ടും കൊവിഡ് വ്യാപനം രൂക്ഷമാകുകയാണ്. കഴിഞ്ഞ 24 മണിക്കൂറിനിടെ 5,062 പേർക്ക് പുതുതായി രോഗം സ്ഥിരീകരിച്ചു. ഇതോടെ ആകെ രോഗബാധിതരുടെ എണ്ണം 3.86 ലക്ഷം കടന്നു. 41 മരണങ്ങളാണ് ഇന്നലെ മാത്രം റിപ്പോർട്ട് ചെയ്തത്. ഇതോടെ ആകെ മരണസംഖ്യ 6,511 ആയി ഉയർന്നു.

മഹാരാഷ്ട്രയിലും സ്ഥിതി ഗുരുതരമായി തുടരുകയാണ്. കഴിഞ്ഞ 24 മണിക്കൂറിനുള്ളിൽ 5,548 കേസുകൾ റിപ്പോർട്ട് ചെയ്തു.ഇതോടെ ആകെ രോഗബാധിതരുടെ എണ്ണം 16 ലക്ഷം പിന്നിട്ടു. ഇതുവരെ 43,911 പേർ മരിച്ചു.