സോൾ : ഇപ്പോൾ യൂട്യൂബിൽ ഏറ്റവും കൂടുതൽ വ്യൂവേഴ്സുള്ള വീഡിയോ ഏതാണെന്നറിയാമോ. ? കുട്ടികൾക്ക് ഏറെ ഇഷ്ടമുള്ള പാട്ടായ ' ബേബി ഷാർക് ' ആണത്. 700 കോടിയിലധികം തവണയാണ് ' ബേബി ഷാർക് ' വീഡിയോ ആളുകൾ കണ്ടിരിക്കുന്നത്. ദക്ഷിണ കൊറിയയിൽ നിന്നാണ് ബേബി ഷാർകിന്റെ ഉത്ഭവം.

' ബേബി ഷാർക്, ഡൂ, ഡൂ, ഡൂ, ഡൂ, ഡൂ, ഡൂ.... ' എന്ന വരികളിൽ തുടങ്ങുന്ന പാട്ടിനൊപ്പമുള്ള ഡാൻസും കളർഫുൾ വീഡിയോയും കുട്ടികൾക്ക് ഏറെ പ്രിയങ്കരമാണ്. ലൂയിസ് ഫോൻസി, ഡാഡി യാൻകീ എന്നിവർ ചേർന്നൊരുക്കിയ ' ഡെസ്പാസിറ്റോ ' എന്ന ഹിറ്റ് ഗാനത്തെ കടത്തിവെട്ടിയാണ് ഏറ്റവും കൂടുതൽ തവണ കണ്ട വീഡിയോകളുടെ ലിസ്റ്റിൽ ഇന്ന് ബേബി ഷാർക് മുന്നിലെത്തിയത്.

2016 ജൂണിലാണ് ബേബി ഷാർക് ആദ്യമായി യൂട്യൂബിൽ അപ്‌ലോഡ് ചെയ്തത്. ഒരു അമേരിക്കൻ കാംപ്‌ഫയർ സോംഗിന്റെ റീമിക്സ് ആയ ബേബി ഷാർക് ദക്ഷിണ കൊറിയയുടെ തലസ്ഥാനമായ സോൾ ആസ്ഥാനമാക്കി പ്രവർത്തിക്കുന്ന പിങ്ക്ഫോംഗ് എന്ന പ്രൊഡക്ഷൻ കമ്പനിയാണ് തയാറാക്കിയത്. മുതിർന്നവരിലും ബേബി ഷാർകിന് ആരാധകർ ഏറെയാണ്.