ന്യൂഡൽഹി: ഇന്ത്യയെ സ്വയംപര്യാപ്‌തമാക്കാനും ഇന്ത്യൻ സമ്പദ്‌വ്യവസ്ഥയെ ആഗോളതലത്തിലേക്ക് ഉയർത്താനും ലക്ഷ്യമിട്ട് പ്രധാനമന്ത്രി പ്രഖ്യാപിച്ച 'ആത്മനിർഭർ പാക്കേജിന്റെ" ഭാഗമായി ധനമന്ത്രാലയം നടപ്പാക്കുന്ന പ്രത്യേക എം.എസ്.എം.ഇ വായ്‌പാ പദ്ധതിയുടെ കാലാവധി ഒക്‌ടോബർ 31ൽ നിന്ന് ഈ മാസം 30ലേക്ക് നീട്ടി. ഇതോടെ, പദ്ധതിയുടെ ആനുകൂല്യം നേടാൻ ഒരുമാസത്തെ സമയം കൂടി സംരംഭകർക്ക് ലഭിക്കും.

നാഷണൽ ക്രെഡിറ്റ് ഗ്യാരന്റി ട്രസ്‌റ്റീ കമ്പനി (എൻ.സി.ജി.ടി.സി) വഴിയാണ് എമർജൻസി ക്രെഡിറ്റ് ലൈൻ ഗ്യാരന്റി സ്‌കീം (ഇ.സി.എൽ.ജി.എസ്) എന്ന പദ്ധതി കേന്ദ്രം നടപ്പാക്കുന്നത്. 100 ശതമാനം ഈടുരഹിത വായ്പയാണിത്. 2020 ഫെബ്രുവരി 29 പ്രകാരം പരമാവധി 50 കോടി രൂപയുടെ വായ്‌പാ തിരിച്ചടവ് ബാക്കിയുള്ളവരും 2019-20 പ്രകാരം 250 കോടി രൂപവരെ വിറ്റുവരവുള്ളവരുമാണ് യോഗ്യർ. നിലവിലെ വായ്‌പാ ബാദ്ധ്യതയുടെ 20 ശതമാനം തുക പദ്ധതി പ്രകാരം പുതുവായ്പയായി ലഭിക്കും. 9.25 ശതമാനം മുതലാണ് പലിശ. നാലുവർഷമാണ് തിരിച്ചടവ് കാലാവധി.

മൊത്തം മൂന്നുലക്ഷം കോടി രൂപയുടെ വിതരണമാണ് പദ്ധതിയിലൂടെ സർക്കാർ ലക്ഷ്യമിടുന്നത്. ബാങ്കുകൾ, ബാങ്കിതര ധനകാര്യ സ്ഥാപനങ്ങൾ എന്നിവ വഴി നടപ്പാക്കുന്ന പദ്ധതിവഴി ഇതിനകം അനുവദിച്ചത് 60.67 ലക്ഷം സംരംഭകർക്കായി 2.03 ലക്ഷം കോടി രൂപയുടെ വായ്പയാണ്. ഇതിൽ 1.48 ലക്ഷം കോടി രൂപ വിതരണം ചെയ്‌തു.