അപോഫിസ് - 99942, ' ഗോഡ് ഒഫ് കോസ് ആൻഡ് ഈവിൾ ' ( God Of Choas and Evil ) എന്നറിയപ്പെടുന്ന ഈജിപ്ഷ്യൻ ദേവനായ അപോഫിസിന്റെ നാമം തന്നെയാണ് കുഴപ്പക്കാരനായ ഈ ഛിന്നഗ്രഹത്തിനും നൽകിയിരിക്കുന്നത്. ഭൂമിയെ ലക്ഷ്യമാക്കി കുതിച്ചുകൊണ്ടിരിക്കുന്ന അപോഫിസ് 2068ൽ ഭൂമിയിൽ ഇടിച്ചിറങ്ങുമെന്നാണ് ജ്യോതിശാസ്ത്രജ്ഞരുടെ പ്രവചനം. 370 മീറ്ററോളം വലിപ്പമാണ് ഈ കൂറ്റൻ ഛിന്നഗ്രഹത്തിനുള്ളത്. ' നിയർ - എർത്ത് ആസ്‌റ്ററോയ്‌ഡ് ' ഗണത്തിലാണ് നാസ അപോഫിസിനെ ഉൾപ്പെടുത്തിയിരിക്കുന്നത്.

പ്രാചീന മായൻ കലണ്ടറിന്റെ അവസാനമായതിനാൽ 2012ൽ ലോകവസാനമെന്ന് വ്യാജപ്രചരണം ഉണ്ടായിരുന്നു. എന്നാൽ ഭൂമിയെ ലക്ഷ്യമാക്കി നീങ്ങുന്ന അപോഫിസ് വിതയ്ക്കാൻ പോകുന്ന ദുരന്തത്തെ പറ്റി പ്രവചിച്ചിരിക്കുന്നത് ശാസ്ത്രലോകമാണ്. മറ്റൊരു കാര്യം, എത്ര വലിയ ശാസ്ത്ര പ്രവചനങ്ങൾക്കും എപ്പോഴും കൃത്യത ഉണ്ടാവണമെന്നില്ല. അതുകൊണ്ട് തന്നെ അപോഫിസിന്റെ കാര്യത്തിലും അങ്ങനെയൊരു തെറ്റ് സംഭവിക്കണേയെന്നാണ് ഏവരുടെയും പ്രാർത്ഥന.

2004ലാണ് അപോഫിസിനെ കണ്ടെത്തുന്നത്. തുടർന്ന് നടത്തിയ നിരീക്ഷണത്തിൽ 2029 ഓടെ ഭൂമിയ്ക്ക് തൊട്ടരികിലൂടെ അപോഫിസ് പറക്കുമെന്ന് ഗവേഷകർ കണ്ടെത്തിയിരുന്നു. 2029 ഏപ്രിൽ 13ന് അപോഫിസ് കടന്നുപോകുന്നത് ഭൂമിയിൽ നിന്നും നഗ്ന നേത്രങ്ങളാൽ കാണാൻ സാധിക്കുമെന്ന് നാസ പറയുന്നു. എന്നാൽ 2068ൽ അപോഫിസ് ഭൂമിയിൽ ഇടിച്ചിറങ്ങുമെന്നാണ് ഗവേഷകർ പറയുന്നത്. അപോഫിസ് ഭൂമിയിൽ പതിക്കില്ലെന്നായിരുന്നു ആദ്യം കരുതിയിരുന്നെങ്കിലും അടുത്തിടെ മറ്റൊരു കാര്യം ഗവേഷകരുടെ ശ്രദ്ധയിൽപ്പെടുകയായിരുന്നു.

യാർക്കോവ്സ്കി പ്രഭാവം കാരണം അപോഫിസിന്റെ വേഗതയിൽ ക്രമാതീതമായ വർദ്ധന ഉണ്ടായതായാണ് കണ്ടെത്തൽ. ബഹിരാകാശ വസ്തുക്കളിൽ ക്രമാതീതമായ ചൂട് വർദ്ധിക്കുന്നത് മൂലം അവ ചൂട് പുറന്തള്ളുകയും തത്ഫലമായി അവയുടെ ഭ്രമണ വേഗത കൂടുകയും ചെയ്യുന്ന പ്രതിഭാസമാണ് യാർക്കോവ്സ്കി പ്രഭാവം. ഇത് കാരണം അവയുടെ സഞ്ചാര പാതയ്ക്കും മാറ്റമുണ്ടാകാം.

ഇക്കാരണത്താൽ അപോഫിസിന്റെ ഭ്രമണപാത കൃത്യമായി നിർണയിക്കാനും പ്രയാസമാണ്. അതുകൊണ്ട് 2029ൽ ശാസ്ത്രജ്ഞർ പ്രവചിച്ചിരിക്കുന്ന സ്ഥാനത്ത് കൂടി അപോഫിസ് കടന്നു പോയില്ലെങ്കിൽ അത് അപകടസൂചനയാകുമെന്ന് ഗവേഷകർ പറയുന്നു. 2068ൽ അപോഫിസ് ഭൂമിയുമായി കൂട്ടിയിടിച്ചേക്കാൻ സാദ്ധ്യത കാണുന്നതായും ഗവേഷകർ ചൂണ്ടിക്കാട്ടുന്നു.