വാഷിംഗ്​ടൺ: അമേരിക്കയിൽ തുടർച്ചയായ മൂന്നാം ദിവസവും കൊവിഡ്​ രോഗികളുടെ എണ്ണം ഒരു ലക്ഷം കടന്നു. കഴിഞ്ഞ ഏഴ്​ ദിവസത്തിനിടെ 95,000ത്തിന്​ മുകളിലാണ്​ പ്രതിദിന രോഗികളുടെ എണ്ണം. വെള്ളിയാഴ്​ച 120,000 പേർക്കാണ്​ രാജ്യത്ത്​ കൊവിഡ്​ ബാധിച്ചത്​.

ഇല്ലിനോയിസിലാണ്​ ഏറ്റവും കൂടുതൽ പേർക്ക്​ രോഗം സ്ഥിരീകരിച്ചത്​. 10,000ലധികം പേർക്ക്​ ഇവിടെ രോഗം ബാധിച്ചു. ഇന്ത്യാന, കൻസാസ്​, മിനിസോട്ട, മിസൗരി, നെബാർസ്​ക, നോർത്ത്​ ഡക്കോട്ട, ഒഹിയോ, വിസ്​കോൻസിൻ തുടങ്ങിയ പ്രദേശങ്ങളിലും രോഗബാധ രൂക്ഷമാണ്.ടെക്​സാസിൽ​ രോഗികളുടെ എണ്ണം 10 ശതമാനം വർദ്ധിച്ചിട്ടുണ്ട്​.

വിസ്​കോൻസിനിൽ ആളുകൾ കൂട്ടം കൂടുന്നതിന്​ നിയന്ത്രണം ഏർപ്പെടുത്തിയിട്ടുണ്ട്​. ചില നഗരങ്ങളിലും സംസ്ഥാനങ്ങളിലും കൊവിഡിനെ പ്രതിരോധിക്കാൻ കർഫ്യു ഏർപ്പെടുത്തിയിട്ടുണ്ട്​. അതേസമയം, മാസ്​ക്​ ഉൾപ്പടെയുള്ള കൊവിഡ് പ്രതിരോധ മാർഗങ്ങൾ നിർബന്ധമാക്കാൻ കേന്ദ്രീകൃത സ്വഭാവത്തിലുള്ള നടപടികൾ രാജ്യത്ത് ഉണ്ടാവുന്നില്ല.