അമേരിക്കൻ പ്രസിഡന്റ് തിരഞ്ഞെടുപ്പിൽ പരാജയപ്പെട്ട ഡൊണാൾഡ് ട്രംപിനെ മറ്റൊരു ദുഃഖവാർത്ത കൂടി കാത്തിരിക്കുന്നുവെന്ന് റിപ്പോർട്ട് . ഡൊണാൾഡ് ട്രംപ് വൈറ്റ് ഹൗസിൽനിന്ന് ഇറങ്ങിയാലുടൻ ഭാര്യ മെലാനിയ വിവാഹമോചനം നേടുമെന്ന വെളിപ്പെടുത്തലാണ് പുറത്തുവന്നിരിക്കുന്നത്.. വൈറ്റ്ഹൗസ് മുൻ ഉദ്യോഗസ്ഥനെ ഉദ്ധരിച്ച് ഡെയ്‌ലി മെയിലാണ് ഇക്കാര്യം റിപ്പോർട്ട് ചെയ്തത്.. വിവാഹമോചനത്തിന് വേണ്ടി നിമിഷങ്ങളെണ്ണി മെലാനിയ കാത്തിരിക്കുകയാണെന്നാണ് റിപ്പോർട്ടിലുള്ളത്.

ദമ്പതിമാരുടെ 15 വർഷം നീണ്ട വിവാഹബന്ധം അവസാനിച്ചു കഴിഞ്ഞുവെന്നാണ് വൈറ്റ് ഹൗസിലെ ഓഫീസ് ഓഫ് പബ്ലിക് ലെയ്‌സൺ മുൻ കമ്യൂണിക്കേഷൻസ് ഡയറക്ടർ ഒമറോസ മാനിഗോൾട്ട് ന്യൂമാൻ പറയുന്നു.. ട്രംപ് വൈറ്റ് ഹൗസിൽ തുടരുന്നകാലത്തോളം അപമാനം സഹിച്ച് മുന്നോട്ടുപോകാനാണ് മെലാനിയ ശ്രമിച്ചത്. ട്രംപ് പ്രതികാരം ചെയ്യുമോ എന്ന് അവർ ഭയപ്പെട്ടിരുന്നുവെന്നും ന്യൂമാൻ വെളിപ്പെടുത്തുന്നു.

2017 ൽ ട്രംപുമായുള്ള അഭിപ്രായ ഭിന്നതയെ തുടർന്ന് ന്യൂമാൻ അപ്രതീക്ഷിതമായി രാജിവെക്കുകയായിരുന്നു. 2016 ൽ ട്രംപ് അമേരിക്കൻ പ്രസിഡന്റ് തിരഞ്ഞെടുപ്പിൽ വിജയിച്ചപ്പോൾ മെലാനിയ ദുഖിതയായിരുന്നുവെന്ന് അരുടെ സുഹൃത്ത് വെളിപ്പെടുത്തി. അദ്ദേഹം വിജയിക്കുമെന്ന് മെലാനിയ കരുതിയിരുന്നില്ല. മകന്റെ പഠനം പൂർത്തിയാക്കുന്നതിനുവേണ്ടി അഞ്ചുമാസം കാത്തിരുന്ന ശേഷമാണ് അവർ ന്യൂയോർക്കിൽനിന്ന് വാഷിംഗ്‌ടണിലേക്ക് താമസം മാറിയത്. വൈറ്റ് ഹൗസിൽ ദമ്പതികൾ പ്രത്യേകം കിടപ്പുമുറികളാണ് ഉപയോഗിച്ചിരുന്നതെന്ന് മെലാനിയയുടെ മുൻ ഉപദേഷ്ടാവ് സ്രെഫാനി വൾക്കോഫും വെളിപ്പെടുത്തിയിട്ടുണ്ട്.