വാഷിംഗ്ടൺ: കമല ഹാരിസ് വൈസ് പ്രസിഡന്റാകുന്നതോടെ, അമേരിക്കയുടെ ചരിത്രത്തിലാദ്യമായി ഒരു സെക്കൻഡ് ജന്റിൽമാൻ ഉണ്ടാവുകയാണ്. കമലയുടെ ഭർത്താവ് ഡഗ്ലസ് എംഹോഫിനാണ് ആ ഭാഗ്യം ലഭിച്ചിരിക്കുന്നത്. 56 കാരനും ജൂത വംശജനുമായ എംഹോഫ് ഒരു അഭിഭാഷകനാണ്. അമേരിക്കൻ പ്രസിഡന്റിന്റെയോ വൈസ് ​പ്രസിഡന്റിന്റെയോ ഇണയാകുന്ന ആദ്യ ജൂത വംശജനെന്ന റെക്കാഡും ഇനി എംഹോഫിന് സ്വന്തം.

'ഇത് വിശേഷപ്പെട്ടൊരു ബഹുമതിയായിരിക്കുമെന്ന് ഞാൻ കരുതുന്നു. ഇത്​ നീതിയിലേക്കുള്ള പ്രവേശനമാണ്​. ഒപ്പം അവസരങ്ങളിലേക്കുള്ള പ്രവേശനവും. ഏറെ പ്രത്യാശയോടെയാണ്​ ഞാനിതിനുവേണ്ടി പ്രവർത്തിക്കുന്നത്​'-കമലയുടെ വിജയത്തിനുമുമ്പ്​ നൽകിയ അഭിമുഖത്തിൽ സെക്കൻഡ്​ ജെന്റിൽമാൻ ആകുന്നത് എങ്ങനെയായിരിക്കുമെന്ന ചോദ്യത്തിന് മറുപടി നൽകുകയായിരുന്നു എംഹോഫ്.

പ്രസിഡൻഷ്യൽ കാമ്പയിനിൽ എംഹോഫ്​ സജീവ സാന്നിദ്ധ്യമായിരുന്നു. ആഗസ്റ്റിൽ കമലയുടെ പ്രചാരണത്തിന്റെ ഭാഗമാകാൻ എംഹോഫ് ജോലിയിൽ നിന്ന്​ അവധിയെടുത്തു. അദ്ദേഹത്തിന്റെ മാതാപിതാക്കളായ മൈക്ക്, ബാർബ് എന്നിവരും പ്രചാരണ പരിപാടിയിൽ പങ്കെടുത്തിരുന്നു.പരമ്പരാഗതമായി ഡെമോക്രാറ്റിക് ശക്തികേന്ദ്രങ്ങളല്ലാത്ത അമേരിക്കൻ സംസ്ഥാനങ്ങളിൽ ബൈഡന്റെ പ്രചാരണങ്ങൾക്ക്​ ചുക്കാൻ പിടിച്ചതും എംഹോഫാണ്. 2014ലാണ്​ കമലയും എംഹോഫും വിവാഹിതരായത്.

 അമേരിക്കൻ പ്രസിഡന്റിന്റെ പങ്കാളിയെ ഫസ്​റ്റ്​ ലേഡി എന്നോ ഫസ്​റ്റ്​ ജന്റിൽമാനെന്നോ ആണ് വിശേഷിപ്പിക്കുന്നത്. എന്നാൽ, വനിതകൾ ഇതുവരെ പ്രസിഡന്റ് പദവി അലങ്കരിച്ചിട്ടില്ലാത്തതിനാൽ അമേരിക്കയിൽ ഇന്നുവരെ ഒരു ഫസ്​റ്റ്​ ജന്റിൽമാൻ ഉണ്ടായിട്ടില്ല.