കൊച്ചി: മന്ത്രി കെ ടി ജലീലിനോട് വിദേശയാത്രകളുടെ രേഖകൾ തേടി കസ്റ്റംസ്. വിവിധ ചടങ്ങുകളിൽ പങ്കെടുക്കാനായി ഷാർജയിലേക്കും ദുബായിലേക്കും നടത്തിയ യാത്രകളുടെ രേഖകൾ ഹാജരാക്കാനാണ് നിർദേശം. മതഗ്രന്ഥം വിതരണം ചെയ്യാൻ സ്വീകരിച്ചതിന്റെ ഉത്തരവാദിത്തം മാത്രമേ തനിക്കുളളൂവെന്ന് മന്ത്രി ചോദ്യം ചെയ്യലിൽ കസ്‌റ്റംസിനോട് വിശദീകരിച്ചിരുന്നു. ഇതിന് തൊട്ടുപിന്നാലെയാണ് നടപടി.
യു എ ഇ കോൺസുലേറ്റ് വഴി ഇറക്കുമതി ചെയ്‌ത മതഗ്രന്ഥങ്ങൾ വിതരണം ചെയ്‌ത കേസിൽ മന്ത്രി കെ ടി ജലീലിനെ കസ്റ്റംസ് ആറ് മണിക്കൂറിലേറെയാണ് ഇന്നലെ ചോദ്യം ചെയ്‌തത്. ഇതിന്റെ തുടർച്ചയായാണ് മന്ത്രിയോട് യാത്ര രേഖകൾ ഹാജരാക്കാൻ നിർദേശിച്ചത്. ഷാർജയിൽ നടന്ന പുസ്‌തക മേളയിലും ദുബായിൽ നടന്ന തിരൂരങ്ങാടി പി എസ് എം ഒ കോളജ് പൂർവ വിദ്യാർത്ഥി സംഗമത്തിലും പങ്കെടുക്കാനായി നടത്തിയ യാത്രകളുടെ അനുമതി പത്രമടക്കമുളള രേഖകളാണ് ഹാജരാക്കേണ്ടത്.
അതേസമയം ഷാർജ പുസ്‌തകമേളയുടെ യാത്രച്ചെലവ് മേളയുടെ സംഘാടകരും ദുബായ് യാത്ര സ്വന്തം ചെലവിലുമായിരുന്നു എന്നാണ് മന്ത്രിയുടെ വിശദീകരണം. രണ്ട് യാത്രകളും മുൻകൂർ അനുമതിയോടെയായിരുന്നുവെന്നും മന്ത്രി വ്യക്തമാക്കി. ഇതിനിടെ മതഗ്രന്ഥം ഇറക്കുമതി ചെയ്‌തത് കോൺസുലേറ്റും ഇളവ് നൽകിയത് കസ്റ്റംസുമാണെന്നിരിക്കെ വിതരണം ചെയ്‌തതിന്റെ ഉത്തരവാദിത്തം മാത്രമെ തനിക്കുളളൂ എന്ന നിലപാടിലാണ് മന്ത്രി.