പ്രേക്ഷകരുടെ പ്രിയപ്പെട്ട മിനിസ്ക്രീൻ താരമാണ് അശ്വതി ശ്രീകാന്ത്. അവതാരകയായെത്തി അഭിനയത്തിലൂടെയും അശ്വതി പ്രേക്ഷകരുടെ കൈയ്യടി നേടി. സോഷ്യൽ മീഡിയയിൽ സജീവമായ അശ്വതി ആരാധകരുമായി തന്റെ വിശേഷങ്ങൾ പങ്കുവയ്ക്കാൻ മറക്കാറില്ല. ഇപ്പോഴിതാ തന്റെ പോസ്റ്റിലൂടെ വീണ്ടും കൈയ്യടി നേടുകയാണ് അശ്വതി. തന്റെ മകളെ വളർത്തുന്നതിനെ കുറിച്ചാണ് അശ്വതി പോസ്റ്റിൽ പറയുന്നത്. എല്ലാ തരം ഭക്ഷണവും കുട്ടികൾ കഴിച്ച് വളരണമെന്നും സാഹചര്യത്തിനൊത്ത് ജീവിക്കാൻ ആൺ, പെൺ വ്യത്യാസമില്ലാതെ പ്രാപ്തരാക്കണമെന്നും അശ്വതി തന്റെ പോസ്റ്റിലൂടെ പറയുന്നു.

 പോസ്‌റ്റിന്റെ പൂർണരൂപം

' എല്ലാത്തരം ഭക്ഷണവും കഴിച്ച് പഠിക്കണം എന്ന് മകളോട് പറയാറുണ്ട്. പുട്ട് കണ്ടാലുടനെ എനിക്ക് ബ്രഡ് മതീന്ന് ബഹളം വയ്ക്കുമ്പോൾ ഇവിടെ ഇന്ന് പുട്ടാണ്, വേണമെങ്കിൽ കഴിച്ചാൽ മതി എന്ന് കടുപ്പിക്കാറുണ്ട്. അതിനർത്ഥം ഇഷ്ടാനിഷ്ടങ്ങൾ ഉണ്ടാവരുതെന്നല്ല , ചിലപ്പോഴൊക്കെ അത് മാറ്റിവയ്ക്കാനും പറ്റണം എന്നാണ്.

'You can’t expect someone else to clean your mess’ എന്ന് പറഞ്ഞു പഠിപ്പിക്കാറുണ്ട്. നാളെ എന്തൊക്കെ സാഹചര്യങ്ങളിലാണ് ജീവിക്കേണ്ടത് എന്ന് ഉറപ്പില്ലാത്തത് കൊണ്ടാണ്. ഒരുപാട് ഹോസ്റ്റലുകളിൽ മാറി മാറി ജീവിച്ചിട്ടുള്ള അമ്മയുടെയും, ബോർഡിംഗ് ജീവിതം ഓർത്ത് ഇപ്പോഴും ഉറക്കം ഞെട്ടുന്ന അച്ഛന്റെയും മകളായതു കൊണ്ടാണ്.

ഓപ്ഷനുകൾ ഇല്ലാതാവുന്ന അവസ്ഥകളിൽ പോലും അതിജീവിക്കണം എന്നുള്ളത് കൊണ്ട് തന്നെയാണ്. അല്ലാതെ പെണ്ണായത് കൊണ്ടല്ല ! എന്നു വച്ചാൽ മകൻ ആയിരുന്നങ്കിലും ഇതൊക്കെ തന്നെ പറഞ്ഞേനേ...പഠിപ്പിച്ചേനേന്ന് ! '