വെല്ലിംഗ്ടൺ​: ന്യൂസിലാൻഡ് പ്രധാനമന്ത്രി ജസിന്ത ആർഡേൻ വിവാഹിതയാകാൻ ഒരുങ്ങുന്നതായി റിപ്പോർട്ട്. 'ഞങ്ങൾക്ക് ചില പദ്ധതികളുണ്ട്. അത്​ അതിന്റെ വഴിയിലാണ്. അത്​ പ്രാവർത്തികമാക്കുന്നതിന്​ മുമ്പ്​ ചില പദ്ധതികൾ ഞങ്ങളുടെ കുടുംബവുമായും സുഹൃത്തുക്കളുമായും പങ്കിടേണ്ടതുണ്ട്' -ജസിന്ത പറഞ്ഞു.വിവാഹത്തെ കുറിച്ചുള്ള ചോദ്യത്തിന്​ ന്യൂസിലൻഡ്​ നഗരമായ പ്ലൈമൗത്തിൽ വച്ച്​ ജസിന്ത പ്രതികരിച്ചു. 40കാരിയായ ജസിന്ത ടെലിവിഷൻ അവതാരകനും ജീവിത പങ്കാളിയുമായ 44കാരൻ ക്ലാർക്​ ഗേഫോഡിനെ ഔദ്യോഗികമായി വിവാഹം ചെയ്​തിട്ടില്ല​. ഇരുവർക്കും രണ്ട്​ വയസായ മകളുണ്ട്​. ഐക്യരാഷ്​ട്രസഭയുടെ ജനറൽ അസംബ്ലിയിൽ മൂന്നു മാസം പ്രായമുള്ള മകളെയും കൈയിലെടുത്ത് എത്തിയ ജസിന്തയുടെ ചിത്രം ഇന്നും മായാതെ ലോകജനതയുടെ മനസിലുണ്ട്. കൊവിഡ് പ്രതിരോധ പ്രവർത്തനങ്ങളിലൂടെ ജനമനസുകളിൽ ഇടം നേടിയ ജസിന്ത തിരഞ്ഞെടുപ്പിലും മികച്ച ഭൂരിപക്ഷം നേടി വിജയിച്ചിരുന്നു.