ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം അഞ്ച് കോടി മുപ്പത് ലക്ഷം കടന്നു. ഇതുവരെ 5,30,71,515 പേർക്കാണ് വൈറസ് ബാധ സ്ഥിരീകരിച്ചത്. മരണസംഖ്യ പതിമൂന്ന് ലക്ഷത്തോടടുക്കുന്നു. രോഗമുക്തി നേടിയവരുടെ എണ്ണം മൂന്ന് കോടി എഴുപത്തൊന്ന് ലക്ഷം പിന്നിട്ടു.

ലോകത്ത് ഏറ്റവും കൂടുതൽ രോഗികളുള്ളത് അമേരിക്കയിലാണ്. യുഎസിൽ പ്രതിദിനം ഒരു ലക്ഷത്തിലധികം പേർക്കാണ് പുതുതായി കൊവിഡ് സ്ഥിരീകരിക്കുന്നത്. ഇതുവരെ രാജ്യത്ത് 1,08,69,537 പേരാണ് രോഗബാധിതരായത്. മരണസംഖ്യ രണ്ടര ലക്ഷത്തിനടുത്തെത്തി. അറുപത്തേഴ് ലക്ഷത്തിലധികം പേർ രോഗമുക്തി നേടി.

ഇന്ത്യയിൽ കൊവിഡ് ബാധിതരുടെ എണ്ണം 87 ലക്ഷം കടന്നു. മരണം 1.28 ലക്ഷവും പിന്നിട്ടു.കഴിഞ്ഞ ദിവസം 47,905 പേർക്കാണ് പുതുതായി രോഗം സ്ഥിരീകരിച്ചത്.4.98 ലക്ഷം പേരാണ് നിലവിൽ ചികിത്സയിലുള്ളത്. ഇത് ആകെ രോഗികളുടെ 5.63ശതമാനമാണ്. രോഗമുക്തി നിരക്ക് 92.89 ശതമാനമാണ്. ആകെ 80,66,501 പേർ രോഗമുക്തരായി. മരണനിരക്ക് 1.48 ശതമാനമാണെന്ന് കേന്ദ്ര ആരോഗ്യമന്ത്രാലയം അറിയിച്ചു.

ലോകത്ത് കൊവിഡ് ബാധിതരുടെ എണ്ണത്തിൽ മൂന്നാം സ്ഥാനത്ത് ഇപ്പോഴും ബ്രസീലാണ്. രാജ്യത്ത് ഇതുവരെ അമ്പത്തേഴ് ലക്ഷത്തിലധികം പേർക്കാണ് കൊവിഡ് സ്ഥിരീകരിച്ചത്. മരണസംഖ്യ 1,64,332 ആയി ഉയർന്നു.രോഗമുക്തി നേടിയവരുടെ എണ്ണം അമ്പത്തിരണ്ട് ലക്ഷം പിന്നിട്ടു. റഷ്യയിലും രോഗവ്യാപനം രൂക്ഷമാകുകയാണ്. രാജ്യത്ത് ഇതുവരെ പതിനെട്ട് ലക്ഷത്തിലധികം പേർക്കാണ് കൊവിഡ് സ്ഥിരീകരിച്ചത്. 32,032 പേർ മരിച്ചു. പതിമൂന്ന് ലക്ഷം പേർ സുഖം പ്രാപിച്ചു.