ഇസ്ലാമാബാദ് : രാജ്യത്തെ ജയിലിലെ കുളിമുറിയിൽ അധികൃതർ ക്യാമറകൾ സ്ഥാപിച്ചിട്ടുണ്ടെന്ന ആരോപണവുമായി പാകിസ്ഥാൻ മുസ്ലിം ലീഗ് നവാസ് (പിഎംഎൽഎൻ) വൈസ് പ്രസിഡന്റ് മറിയം നവാസ് ഷെരീഫ്. അടുത്തിടെ നൽകിയ അഭിമുഖത്തിലാണ് താൻ ജയിലിൽ നേരിട്ട ദുരനുഭവങ്ങൾ മറിയം വെളിപ്പെടുത്തിയത്.

കഴിഞ്ഞ വർഷം ചൗധരി പഞ്ചസാര മിൽസ് കേസിൽ മറിയം അറസ്റ്റിലായിരുന്നു. ജയിലിൽ കിടക്കുമ്പോൾ തനിക്ക് നേരിടേണ്ടി വന്ന അസൗകര്യങ്ങളെക്കുറിച്ച് മറിയം നവാസ് ഷെരീഫ് അടുത്തിടെ നടത്തിയ അഭിമുഖത്തിൽ സംസാരിച്ചുവെന്ന് ജിയോ ന്യൂസ് റിപ്പോർട്ട് ചെയ്തു.'ഞാൻ രണ്ടുതവണ ജയിലിൽ പോയിട്ടുണ്ട്.ഒരു സ്ത്രീയായ ഞാൻ ജയിലിൽ അനുഭവിച്ചതിനെക്കുറിച്ച് പറഞ്ഞാൽ അവർക്ക് മുഖം പുറത്ത് കാണിക്കാനുള്ള ധൈര്യം ഉണ്ടാകില്ല'-സർക്കാരിനെ പരാമർശിച്ച് കൊണ്ട് മറിയം പറഞ്ഞു.

'പാകിസ്ഥാനിലായാലും, മറ്റെവിടെയായാലും ഒരു സ്ത്രീ ദുർബലയല്ല,' -അവർ പറഞ്ഞു.ഭരണഘടനയുടെ പരിധിക്കുള്ളിൽ സൈനിക സ്ഥാപനവുമായി ചർച്ച നടത്താൻ തങ്ങളുടെ പാർട്ടി തയ്യാറാണെന്ന് മറിയം നവാസ് ഷെരീഫ് പറഞ്ഞതായി ജിയോ ന്യൂസ് റിപ്പോർട്ട് ചെയ്തു.താൻ സംസ്ഥാന സ്ഥാപനങ്ങൾക്ക് എതിരല്ലെന്നും അവർ വ്യക്തമാക്കി.