തിരുവനന്തപുരം:സി പി എം സംസ്ഥാനസെക്രട്ടറി സ്ഥാനത്തുനിന്ന് മാറിനിൽക്കാനുളള കോടിയേരി ബാലകൃഷ്ണന്റെ തീരുമാനത്തിൽ പ്രതികരണവുമായി പ്രതിപക്ഷ നേതാവ് രമേശ് ചെന്നിത്തലയും മുൻമുഖ്യമന്ത്രി ഉമ്മൻ ചാണ്ടിയും രംഗത്തെത്തി.

കോടിയേരിയുടെ തീരുമാനത്തെ വൈകിവന്ന വിവേകമെന്നാണ് പ്രതിപക്ഷ നേതാവ് രമേശ് ചെന്നിത്തല വിശേഷിപ്പിച്ചത്. 'മകന്റെ പേരിലെ വിവാദങ്ങൾ ഉണ്ടാക്കിയ പരി​ക്കിൽ നിന്ന് പാർട്ടിയെ രക്ഷിക്കാനാണ് കോടിയേരിയുടെ ശ്രമം. പാർട്ടി വേറെ മകൻ വേറെ എന്നാണ് ഇതുവരെ പറഞ്ഞിരുന്നത്. ഇപ്പോൾ എല്ലാം ഒന്നാണെന്ന് എല്ലാവർക്കും മനസിലായി.കോടിയേരിയുടെ പാത പിൻതുടരുകയാണ് ഇനി മുഖ്യമന്ത്രി പിണറായി വിജയൻ ചെയ്യേണ്ടത്'- ചെന്നി​ത്തല പറഞ്ഞു. സർക്കാരി​നെ പിരിച്ച് വിട്ട് ജനവിധി തേടാൻ മുഖ്യമന്ത്രിയെ വെല്ലുവി​ളി​ച്ച പ്രതിപക്ഷ നേതാവ് സിപിഎം സംസ്ഥാന സെക്രട്ടറിയുടെ പകരം ചുമതല എ വിജയരാഘവനെ ഏൽപ്പി​ച്ചതി​നെ പരി​ഹസി​ക്കുകയും ചെയ്തു.

കോടി​യേരി​യുടെ സ്ഥാനമാറ്റം നേരത്തേ ആകാമായി​രുന്നു എന്നായി​രുന്നു ഉമ്മൻചാണ്ടി​യുടെ പ്രതി​കരണം. 'ഇത്തരമൊരു തീരുമാനം നേരത്തേ എടുത്തി​രുന്നെങ്കി​ൽ വി​വാദങ്ങൾ ഒഴി​വാക്കാമായി​രുന്നു. വൈകി​യെങ്കി​ലും തീരുമാനം നന്നായി​.എന്നാൽ ഇതുകൊണ്ട് ഇടതുപക്ഷത്തി​ന്റെ പ്രതി​സന്ധി​കൾ തീരി​ല്ല. ബി​നീഷ് കോടി​യേരി​ക്കെതി​രായ ആരോപണങ്ങൾ വെറും ആക്ഷേപമല്ല. മറി​ച്ച് യാഥാർത്ഥ്യമാണ്. ഇക്കാര്യം ജനങ്ങൾക്ക് അറി​യാം'-ഉമ്മൻചാണ്ടി​ പറഞ്ഞു.