മീറ‌റ്റ്: ഉത്തർപ്രദേശിലെ മീ‌ററ്റിലെ ഒരു കുടുംബം വീടിന്റെ തട്ടിൻപുറത്ത് കണ്ട ബാഗ് തുറന്ന് നോക്കിയപ്പോൾ കണ്ണ് തള്ളിപ്പോയി. ബാഗുകൾ നിറയെ നോട്ടുകളും സ്വർണവും. ഏകദേശം 40 ലക്ഷം രൂപയുണ്ടായിരുന്നു ഇരുബാഗുകളിലുമായി.
സംഭവം ഉടനെ പൊലീസിൽ അറിയിച്ചു. പൊലീസ് അന്വേഷണത്തിൽ അടുത്തുള്ള ബിസിനസുകാരന്റെ വീട്ടിൽ നിന്ന് തലേദിവസം 40 ലക്ഷം രൂപ മോഷണം പോയതായി കണ്ടെത്തി.
തുടർന്ന് പൊലീസ് നടത്തിയ അന്വേഷണത്തിൽ ബിസിനസുകാരന്റെ വീട്ടിലെ ജോലിക്കാരന്റെ സഹായത്തോടെയാണ് മോഷണം നടന്നതെന്ന് കണ്ടെത്തി. ബിസിനസുകാരന്റെ വീട്ടിലെ ജോലിക്കാരനായ നേപ്പാൾ സ്വദേശി രാജു മോഷണത്തിന് സഹായിക്കുന്നത് സി.സി ടി.വി കാമറയിൽ പതിഞ്ഞിരുന്നു. ഇയാൾക്കൊപ്പം മ‌റ്റൊരാളും ചേർന്നാണ് മോഷണം നടത്തിയതെന്നും ദൃശ്യങ്ങളിൽ നിന്ന് വ്യക്തമായി. തുടർന്ന് ഈ പണം പിന്നീട് എടുക്കാമെന്ന് കരുതി അടുത്തുള്ള വീടിന്റെ തട്ടിൻപുറത്ത് സൂക്ഷിക്കുകയായിരുന്നു. ഇതാണ് വീട്ടുകാർ കണ്ടെത്തിയത്.
നേപ്പാളി രാജുവും സുഹൃത്തും ഇപ്പോൾ പൊലീസ് കസ്‌റ്റഡിയിലാണ്.