കൊച്ചി: ഇന്ത്യൻ സൂപ്പർ ലീഗിന്റെ ഏഴാം സീസണിനായുള്ള കേരള ബ്ലാസ്റ്റേഴ്സിന്റെ ഹോം കിറ്റ് അവതരിപ്പിച്ചു. കേരളത്തിനോടുള്ള ആദരമായാണ് ക്ലബിന്റെ പതിവ് മഞ്ഞ, നീല നിറങ്ങളിലുള്ള പുതിയ ജേഴ്‌സി. മലയാളികളുടെ ദൈനംദിന ജീവിതത്തിന്റെ ഭാഗമായ ചക്ക, ബനാന ചിപ്‌സ്, ബനാന ഫ്രിറ്റേഴ്‌സ്, വിഷുക്കണി പൂക്കൾ തുടങ്ങി നിരവധി പരമ്പരാഗത ഘടകങ്ങളുടെ കാതലായ സവിശേഷതയായ മഞ്ഞ നിറവർണത്തിലൂടെ, സംസ്ഥാനത്തിന്റെ സംസ്‌ക്കാരത്തെയാണ് കിറ്റ് വിളംബരം ചെയ്യുന്നത്. പരമ്പരാഗത സെറ്റ് മുണ്ടിനെ അല്ലെങ്കിൽ സാരിയുടെ കരയെ പ്രതിനിധീകരിക്കുന്നതാണ് ജേഴ്‌സിയുടെ വീതിയിലുള്ള സമാന്തര രേഖകൾ. ടീം അംഗങ്ങൾക്കും ആരാധകർക്കും എവിടെയിരുന്നാലും കേരളീയത്വം അനുഭവപ്പെടുന്ന രീതിയിലാണ് കിറ്റ് അടയാളപ്പെടുത്തിയിരിക്കുന്നത്.
ക്ലബിന്റെ എവേ കിറ്റ് കഴിഞ്ഞയാഴ്ച പുറത്തിറക്കിയിരുന്നു. മകുടം, ആന, ക്ലബിന്റെ ബാഡ്ജ്, കേരള സംസ്ഥാനം തുടങ്ങി ആരാധകരിൽ ആവേശം ജനിപ്പിക്കുന്ന എല്ലാ ഘടകങ്ങളും ഉൾക്കൊള്ളിച്ച് കൃത്യതയോടെ നെയ്‌തെടുത്ത ജേഴ്‌സിയിൽ നീലനിറത്തെ പ്രതിധ്വനിപ്പിക്കുന്ന സവിശേഷതയുമുണ്ട്.
കേരളം (ഹോം കിറ്റ്), ആരാധകർ (എവേ കിറ്റ്), കമ്മ്യൂണിറ്റി (തേർഡ് കിറ്റ്) എന്നിങ്ങനെ ഈ സീസണിൽ ക്ലബ് പുറത്തിറക്കിയ ജേഴ്‌സികൾ, കേരള ബ്ലാസ്റ്റേഴ്സിന്റെ ഭാഗമായ മൂന്ന് പ്രധാന ഘടകങ്ങളെ ആഘോഷിക്കുന്നതിന് പ്രാധാന്യം കൊടുത്താണ് നിർമ്മിച്ചിരിക്കുന്നത്.
സ്വർണചിത്ര പണികളുള്ള ഞങ്ങളുടെ യെല്ലോ ഹോം കിറ്റ് കേരളത്തിനുള്ള ആദരമാണ്. കേരളത്തിന്റെ കാതലയായ മഞ്ഞയിലെ വിവിധഘടകങ്ങൾ എങ്ങനെ ജേഴ്‌സിക്ക് പ്രചോദനമായെന്നത് പോലെ നമ്മൾ എവിടെയിരുന്ന് ഈ ജഴ്‌സി ധരിച്ചാലും എല്ലാം മറികടന്ന് നമ്മളെ ഓരോരുത്തരെയും ഒന്നിപ്പിക്കുമെന്ന് ഞങ്ങൾ പ്രതീക്ഷിക്കുന്നു. മഞ്ഞ നമ്മുടെ നിറമാണ്. നമ്മൾ എന്നും മഞ്ഞയാണ്-
കേരള ബ്ലാസ്‌റ്റേഴ്‌സ് ഡയറക്ടർ നിഖിൽ ഭരദ്വാജ്