വാഷിംഗ്ടൺ: അമേരിക്കൻ പ്രസിഡന്റ് തിരഞ്ഞെടുപ്പിൽ ഡെമോക്രാറ്റിക് സ്ഥാനാർത്ഥി ജോ ബൈഡന്റെ വിജയം പരസ്യമായി അംഗീകരിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ്. എന്നാൽ, തന്റെ പരാജയം അംഗീകരിക്കാൻ അദ്ദേഹം തയ്യാറായിട്ടുമില്ല.

ട്വിറ്ററിലൂടെയാണ്​ തിരഞ്ഞെടുപ്പ്​ ഫലത്തിൽ കൃത്രിമം കാണിച്ചെന്ന അടിസ്ഥാന രഹിതമായ ആരോപണത്തോടൊപ്പം ​ബൈഡൻ വിജയിച്ചുവെന്ന്​ ട്രംപ്​ സമ്മതിച്ചത്.

വോ​ട്ടെണ്ണുന്ന സമയത്ത്​ ​നിരീക്ഷിക്കാൻ ആരെയും അനുവദിച്ചില്ലെന്നും തീവ്ര ഇടത്​ പക്ഷക്കാർ ഉടമകളായ സ്വകാര്യ സ്ഥാപനമാണ് വോട്ട്​ ടാബുലേഷൻ നടത്തിയതെന്നും ട്രംപ്​ ആരോപിച്ചു. വ്യാജ മാദ്ധ്യമങ്ങളുടെ കണ്ണിൽ മാത്രമാണ് ബൈഡന്‍ വിജയിച്ചതെന്നും ട്രംപ് ട്വീറ്റിൽ പറഞ്ഞു.

'ഞാൻ ഒന്നും സമ്മതിക്കുന്നില്ല. ഞങ്ങൾക്ക് ഒരുപാട് ദൂരം ഇനിയും സഞ്ചരിക്കാനുണ്ട്. ഇതൊരു കടുത്ത തിരഞ്ഞെടുപ്പായിരുന്നു."- ട്രംപ് കുറിച്ചു.

ഈ ട്വീറ്റ് ട്വിറ്റർ ഫ്ലാഗ് ചെയ്തിട്ടുണ്ട്.