ന്യൂയോര്‍ക്ക്: യു.എസ് ബയോടെക്‌നോളജിക്കല്‍ കമ്പനിയായ മോഡേണ വികസിപ്പിച്ച കൊവിഡ് 19 വാക്സിന് 94.5 ശതമാനം ഫലപ്രാപ്തിയെന്ന് മൂന്നാം ഘട്ട പരീക്ഷണത്തിന്റെ റിപ്പോര്‍ട്ട്. അവസാനഘട്ട ക്ലിനിക്കല്‍ പരീക്ഷണത്തിന്റെ ഫലം ഏതാനും ദിവസങ്ങള്‍ക്കുള്ളില്‍ പുറത്തുവരുമെന്നാണ് പ്രതീക്ഷിക്കുന്നത്. മഹത്തരമായ ദിവസമാണെന്നും വരുന്ന ആഴ്ചകളില്‍ അനുമതിക്കായി അപേക്ഷ നല്‍കുമെന്നും കമ്പനി അറിയിച്ചു.
യു.എസിലെ 30000 പേരെ ഉള്‍പ്പെടുത്തിയാണ് പരീക്ഷണം നടത്തിയത്. പകുതി പേര്‍ക്ക് രണ്ട് ഡോസ് വാക്സിന് കുത്തിവെച്ചു. ബാക്കിയുള്ളവരില്‍ ഡമ്മി കുത്തിവെപ്പ് നല്‍കി. കൊവിഡ് ലക്ഷണങ്ങള്‍ പ്രകടിപ്പിച്ച ആദ്യത്തെ 95 പേരെ അടിസ്ഥാനമാക്കിയാണ് കമ്പനിയുടെ വിശകലനം. വാക്സിന് നല്‍കിയ അഞ്ച് പേരില്‍ മാത്രമാണ് കൊവിഡ് പോസിറ്റീവായത്. 94.5 ശതമാനം പരിരക്ഷ വാക്സിന് നല്‍കുന്നുവെന്ന് കമ്പനി പറയുന്നു.
വാക്സിന്റെ മൊത്തത്തിലുള്ള ഫലപ്രാപ്തി ശ്രദ്ധേയമാണ്. 'ഇന്നത്തെ ദിനം മഹത്തരമാണ്' മോഡേണയിലെ ചീഫ് മെഡിക്കല്‍ ഓഫിസര്‍ പറഞ്ഞു. അതേസമയം, പ്രായമേറിയവരില്‍ വാക്സിന് പ്രവര്‍ത്തനമെങ്ങനെയെന്നത് കൃത്യമല്ല. പ്രായം വാക്സിന്റെ ഫലപ്രാപ്തിയെ ബാധിക്കില്ലെന്ന് മാത്രമാണ് മെഡിക്കല്‍ ഓഫിസര്‍ പറഞ്ഞത്. സുരക്ഷാ സംബന്ധമായ പ്രശ്നങ്ങള്‍ റിപ്പോര്‍ട്ട് ചെയ്തിട്ടില്ല. ബഹുരാഷ്ട്ര മരുന്നുകമ്പനിയായ ഫൈസര്‍ വികസിപ്പിച്ച കൊവിഡ് വാക്സിന് 90 ശതമാനത്തിലധികം ഫലപ്രാപ്തിയുണ്ടെന്ന റിപ്പോര്‍ട്ട് പുറത്തു വന്ന് ഒരാഴ്ചയ്ക്ക് ശേഷമാണ് മോഡേണ വാക്സിന്റെ അവസാന ഘട്ട പരീക്ഷണത്തില്‍ നിന്നുള്ള പ്രാഥമിക ഫലങ്ങളും പുറത്തു വരുന്നത്.