ലോസ്ആഞ്ചലസ് : ഒരു വാക്സിൻ കൊണ്ട് മാത്രം കൊവിഡ് മഹാമാരിയെ തടയാനാകില്ലെന്ന് ലോകാരോഗ്യ സംഘടനാ മേധാവി. നിലവിൽ കൊവിഡിനെ പ്രതിരോധിക്കാനുള്ള വിവിധ മാർഗങ്ങളുടെ കൂട്ടത്തിലേക്ക് ഏറ്റവും പ്രയോജനകരമായ ഒന്നായി കൊവിഡ് 19 വാക്സിൻ മാറും. എന്നാൽ അതുകൊണ്ട് മഹാമാരിയെ ഇല്ലാതാക്കാൻ കഴിയില്ലെന്ന് ലോകാരോഗ്യ സംഘടനാ മേധാവി ടെഡ്രോസ് അഡനോം ഗബ്രിയേസിസ് പറഞ്ഞു.

' കൊവിഡ് പ്രതിരോധത്തിന് നമ്മുടെ പക്കലുള്ള പ്രതിരോധ ഉപാധികളുടെ കൂട്ടത്തിലേക്കാണ് വാക്സിൻ വരുന്നത്. എന്നാൽ, ഈ ഉപധികൾക്കെല്ലാം പകരമാകാൻ വാക്സിന് കഴിയില്ല. മഹാമാരിയെ ഇല്ലാതാക്കാൻ വാക്സിനെ കൊണ്ട് മാത്രം സാധിക്കില്ല. ' ടെഡ്രോസ് പറയുന്നു.

കൊവിഡ് വാക്സിൻ എത്തിയാൽ ആദ്യഘട്ടത്തിൽ പരിമിതമായ അളവിൽ മാത്രമേ വിതരണം ചെയ്യാൻ സാധിക്കൂ എന്നും ഇത് മരണനിരക്ക് കുറയ്ക്കാൻ സാധിക്കുമെന്നും രോഗവ്യാപനം കുറഞ്ഞ രാജ്യങ്ങളിൽ കൊവിഡ് കുത്തനെ ഉയരുന്ന സാഹചര്യത്തിൽ ജാഗ്രത കൈവിടരുതെന്നും അദ്ദേഹം കൂട്ടിച്ചേർത്തു.