വാഷിംഗ്‌ടൺ: പ്രധാനമന്ത്രി നരേന്ദ്രമോദിക്ക് നന്ദി അറിയിച്ച് നിയുക്ത അമേരിക്കൻ പ്രസിഡന്റ് ജോ ബെെഡൻ.വിജയാശംസകൾ നേർന്ന് കൊണ്ട് നരേന്ദ്രമോദി ബെെഡനെ കഴിഞ്ഞ ദിവസം ഫോണിൽ വിളിച്ച് സംസാരിച്ചിരുന്നു. ഇന്ത്യ- യുഎസ് ഉഭയകക്ഷി ബന്ധവും പങ്കാളിത്തവും ശക്തിപ്പെടുത്തുന്നതിനും വിപുലീകരിക്കുന്നതിനുമുള്ള ആഗ്രഹവും മോദി പ്രകടിപ്പിച്ചിരുന്നു. ഇതിന് പിന്നാലെയാണ് ജോ ബെെഡൻ മോദിക്ക് നന്ദി അറിയിച്ചത്.
കൊവിഡ് പ്രതിസന്ധി, സമ്പദ്‌വ്യവസ്ഥ തുടങ്ങിയ വിഷയങ്ങളിൽ ഇന്ത്യയുമായി
ഒത്തുപ്രവർത്തിക്കാൻ ജോ ബെെഡന് താൽപ്പര്യമുണ്ടെന്ന സൂചനകളും പുറത്തുവരുന്നുണ്ട്. കൊവിഡ് മൂലം ഉണ്ടാകാനിടയുള്ള ഭാവിയിലെ ആരോഗ്യ പ്രതിസന്ധികൾക്കെതിരെ പ്രതിരോധം തീർക്കാനും കാലാവസ്ഥാ വ്യതിയാനം, ആഗോള സാമ്പത്തിക പ്രതിസന്ധി, ആഗോളതലത്തിൽ ജനാധിപത്യം ശക്തിപ്പെടുത്തുക,ഇന്തോ-പസഫിക് പ്രദേശം സുരക്ഷിതമായി നിലനിറുത്തുക തുടങ്ങിയ കാര്യങ്ങളിൽ പ്രധാനമന്ത്രി മോദിയുമായി സഹകരിച്ച് പ്രവർത്തിക്കാൻ ബെെഡൻ ആഗ്രഹിക്കുന്നുവെന്നും അദ്ദേഹവുമായി ബന്ധപ്പെട്ട വൃത്തങ്ങൾ പറയുന്നു.
"അമേരിക്കൻ പ്രസിഡന്റായി തിരഞ്ഞെടുക്കപ്പെട്ട ജോ ബൈഡനുമായി ഫോണിൽ സംസാരിച്ച് അഭിനന്ദനം അറിയിച്ചു. ഇന്തോ-യുഎസ് പങ്കാളിത്തത്തോടുള്ള ഞങ്ങളുടെ പ്രതിബദ്ധത അവർത്തിക്കുകയും ചർച്ച ചെയ്യുകകയും ചെയ്‌തു. കൊവിഡ് -19 പകർച്ചവ്യാധി, കാലാവസ്ഥാ വ്യതിയാനം, ഇന്തോ-പസഫിക് മേഖലയിലെ സഹകരണം തുടങ്ങിയ കാര്യങ്ങളിലെ ആശങ്കകളും പങ്കുവച്ചു." ബെെഡനുമായി സംസാരിച്ചതിന് പിന്നാലെ മോദി ട്വീറ്റ് ചെയ്‌തു.