കൊച്ചി: എറണാകുളം മുൻ ജില്ലാ കളക്‌ടർ എം ജി രാജമാണിക്യത്തിനെതിരെ വിജിലൻസ് അന്വേഷണത്തിന് അനുമതി. അഴിമതി നിരോധന വകുപ്പ് പ്രകാരം അന്വേഷണം നടത്താനാണ് സർക്കാർ അനുമതി നൽകിയത്. കൊച്ചി മെട്രോ റെയിലിന് വേണ്ടി ശീമാട്ടിയുടെ ഭൂമി ഏറ്റെടുത്തുമായി ബന്ധപ്പെട്ട കേസിലാണ് നടപടി. രാജമാണിക്യം നിലവിൽ കെ എസ് ഐ ടി ഐ എൽ എം ഡിയാണ്. അന്വേഷണം സംബന്ധിച്ച വിജിലൻസ് തീരുമാനം കോടതിയിൽ സമർപ്പിച്ചു.

കൊച്ചി മെട്രോ റെയിലിനായി വസ്ത്ര വ്യാപാര സ്ഥാപനമായ ശീമാട്ടിയുടെ ഭൂമി ഏറ്റെടുത്തതിൽ അഴിമതിയുണ്ടെന്ന ആരോപണത്തിൽ തുടരന്വേഷണത്തിന് മുവാറ്റുപുഴ വിജിലൻസ് കോടതി നേരത്തെ അനുമതി നൽകിയിരുന്നു. മെട്രൊ സ്ഥലമേറ്റെടുപ്പിന്റെ വ്യവസ്ഥകളിൽ ശീമാട്ടിക്ക് മാത്രമായി ഇളവുവരുത്തിയെന്ന ആരോപണത്തിലാണ് അന്വേഷണം നടക്കുന്നത്.