റിലയന്‍സ് ജിയോഫോണിന് 300 രൂപ വര്‍ദ്ധിക്കാന്‍ സാദ്ധ്യത. ഇതോടെ പുതിയ ജിയോഫോണിന് 999 രൂപ വിലവരും. നിര്‍ബന്ധിത റീചാര്‍ജ് പായ്ക്ക് 125 രൂപയും ഫീച്ചര്‍ ഫോണിനൊപ്പം വില്‍ക്കും. അങ്ങനെ, ഫീച്ചര്‍ ഫോണിന്റെ ആകെ വില 1124 രൂപയായിരിക്കും. 125 രൂപ ജിയോഫോണ്‍ ഓള്‍ഇന്‍വണ്‍ പ്ലാനില്‍ ജിയോഫോണില്‍ നിന്ന് ഏത് ജിയോ നമ്പറിലേക്കും സൗജന്യ കോളുകള്‍ വാഗ്ദാനം ചെയ്യുന്നു, ഒപ്പം 500 ഓഫ് നെറ്റ് മിനിറ്റുകളും 14 ജിബി ഡാറ്റയും ഒരു മാസത്തേക്ക് ലഭിക്കും.
വരും ദിവസങ്ങളില്‍ പ്രഖ്യാപനം നടത്തും. നിലവില്‍, ജിയോഫോണ്‍ 699 രൂപ നിരക്കിലാണ് വരുന്നത്. ദീപാവലിയില്‍ ജിയോ ഓഫര്‍ കൊണ്ടുവന്നതിനുശേഷം വില അതേപടി തുടരുന്നു. ഓഫറിന്റെ ഭാഗമായി റിലയന്‍സ് 1500 രൂപ സെക്യൂരിറ്റി ഡെപ്പോസിറ്റ് ഫോണില്‍ നിന്ന് നീക്കം ചെയ്തു. മൂന്ന് വര്‍ഷത്തിനുള്ളില്‍ ഉപയോക്താക്കള്‍ ഹാന്‍ഡ്സെറ്റ് തിരികെ നല്‍കിയാല്‍ 299 രൂപ തിരികെ നല്‍കുമെന്നും ജിയോ അറിയിച്ചു. റീചാര്‍ജുകള്‍ക്കായി ഉപഭോക്താക്കള്‍ക്ക് 99 രൂപ ഡാറ്റാ പായ്ക്കുകളും ലഭിച്ചു. വിലവര്‍ദ്ധനവിന് സാധ്യതയുള്ളതിനാല്‍, ഫീച്ചര്‍ ഫോണിനായുള്ള എല്ലാ ഓഫറുകളും ജിയോ നിലനിര്‍ത്തുമോ എന്ന് വ്യക്തമല്ല.