ന്യൂയോർക്ക്: ലോകത്ത് കൊവിഡ് രോഗികളുടെ എണ്ണം കുതിച്ചുയരുന്നു. ആറ് ലക്ഷത്തിലധികം പേർക്കാണ് പുതുതായി രോഗം സ്ഥിരീകരിച്ചത്. ഇതോടെ ആകെ രോഗബാധിതരുടെ എണ്ണം 5,72,06,663 ആയി ഉയർന്നു. 13,64,754 പേർ മരണമടഞ്ഞു. രോഗമുക്തി നേടിയവരുടെ എണ്ണം മൂന്ന് കോടി തൊണ്ണൂറ്റിയാറ് ലക്ഷം പിന്നിട്ടു. അമേരിക്ക,ഇന്ത്യ,ബ്രസീൽ, ഫ്രാൻസ് തുടങ്ങിയ രാജ്യങ്ങളിലാണ് ഏറ്റവും കൂടുതൽ രോഗികളുള്ളത്.

ലോകത്ത് ഏറ്റവും കൂടുതൽ പേർക്ക് കൊവിഡ് ബാധിച്ചത് അമേരിക്കയിലാണ്. വേൾഡോമീറ്ററിന്റെ കണക്കുപ്രകാരം യുഎസിൽ കഴിഞ്ഞ ദിവസം 1,86,017 പേർക്കാണ് രോഗം സ്ഥിരീകരിച്ചത്. ഇതോടെ ആകെ രോഗികളുടെ എണ്ണം ഒരു കോടി പന്ത്രണ്ട് ലക്ഷം പിന്നിട്ടു. 2,58,271 പേർ മരിച്ചു.72,25,705 പേർ രോഗമുക്തി നേടി.

ഇന്ത്യയിൽ പ്രതിദിന രോഗികളുടെ എണ്ണം വീണ്ടും ഉയർന്നു. കഴിഞ്ഞദിവസം 45,576 പേർക്കാണ് രോഗം സ്ഥിരീകരിച്ചത്. ഇതോടെ ആകെ രോഗികളുടെ എണ്ണം 90 ലക്ഷം കടന്നു.നിലവിൽ 4,43,303 പേരാണ് ചികിത്സയിലുള്ളത്. ആകെ രോഗികളുടെ 4.95 ശതമാനം മാത്രമാണിത്.കൊവിഡ് മുക്തി നിരക്ക് 93.58 ശതമാനമായി വർദ്ധിച്ചു. ആകെ രോഗമുക്തരുടെ എണ്ണം 83,83,602 ആയി.

ബ്രസീലിലും സ്ഥിതി ഗുരുതരമായി തുടരുകയാണ്. രാജ്യത്ത് 59,83,089 പേർക്കാണ് ഇതുവരെ കൊവിഡ് സ്ഥിരീകരിച്ചത്. മരണസംഖ്യ 1,68,141 ആയി ഉയർന്നു. രോഗമുക്തി നേടിയവരുടെ എണ്ണം അമ്പത്തിനാല് ലക്ഷം പിന്നിട്ടു. ഫ്രാൻസിലും രോഗികളുടെ എണ്ണം കുത്തനെ ഉയരുകയാണ്. രാജ്യത്ത് ഇരുപത് ലക്ഷത്തിലധികം ആളുകൾക്ക് കൊവിഡ് സ്ഥിരീകരിച്ചു.47,127 പേർ മരിച്ചു.