കറാച്ചി: 1,300 വർഷങ്ങൾക്ക് മുമ്പ് നിർമിച്ചതെന്ന് കരുതുന്ന ഹിന്ദു ക്ഷേത്രം വടക്ക് പടിഞ്ഞാറൻ പാകിസ്ഥാനിലെ സ്വാത് ജില്ലയിലെ ഒരു പർവത മേഖലയിൽ കണ്ടെത്തി. പാകിസ്ഥാനി, ഇറ്റാലിയൻ ആർക്കിയോളജിസ്റ്റുകൾ ബാരികോട്ട് ഘുണ്ടായിയിൽ നടത്തിയ ഖനനത്തിലൂടെയാണ് ക്ഷേത്രം കണ്ടെത്തിയത്.

തങ്ങൾ കണ്ടെത്തിയിരിക്കുന്നത് ഒരു വിഷ്ണു ക്ഷേത്രമാണെന്ന് ഖൈബർ പഖ്‌തുൻഖ്വ പ്രവിശ്യയിലെ പുരാവസ്തു വകുപ്പ് അധികൃതർ അറിയിച്ചു. ഹിന്ദു ശാഹി കാലഘട്ടത്തിലാണ് ക്ഷേത്രം പണികഴിപ്പിച്ചിരിക്കുന്നത്. സി.ഇ 850 - സി.ഇ 1026 കാലഘട്ടത്തിൽ കാബൂൾ താഴ്‌വര ( കിഴക്കൻ അഫ്ഗാനിസ്ഥാൻ ), ഗാന്ധാരം ( ഇന്നത്തെ പാകിസ്ഥാൻ ), ഇന്നത്തെ വടക്ക് പടിഞ്ഞാറൻ ഇന്ത്യൻ പ്രദേശങ്ങൾ എന്നിവ ഭരിച്ചിരുന്ന ഹിന്ദു രാജവംശമായിരുന്നു കാബൂൾ ശാഹി അഥവാ ഹിന്ദു ശാഹി.

ഖനനത്തിനിടെ,​ ക്ഷേത്രം കണ്ടെത്തിയ ഭാഗത്തിനടുത്ത് തന്നെ സൈനികത്താവളം, കാവൽ ഗോപുരങ്ങൾ എന്നിവയുടെ അവശിഷ്ടങ്ങളും കണ്ടെത്തി. ക്ഷേത്രത്തിൽ പ്രവേശിക്കുന്നതിന് മുമ്പ് ശുദ്ധിയാകാൻ ഉപയോഗിച്ചിരുന്നത് എന്ന് കരുതുന്ന ഒരു ജല സംഭരണിയും ഗവേഷകർ കണ്ടെത്തി.

ആയിരക്കണക്കിന് വർഷങ്ങൾക്ക് മുമ്പുള്ള പുരാവസ്തുക്കൾ കണ്ടെടുത്തിട്ടുള്ള സ്വാത് ജില്ലയിൽ നിന്നും ഇതാദ്യമായാണ് ഹിന്ദു ശാഹി കാലഘട്ടത്തിലെ നിർമിതിയുടെ അവശിഷ്ടങ്ങൾ കണ്ടെത്തുന്നത്. സ്വാത് ജില്ലയിൽ കണ്ടെത്തുന്ന ആദ്യത്തെ ഗാന്ധാര സംസ്കാരത്തിന്റെ ക്ഷേത്രമാണിത്.