വാഷിംഗ്ടൺ: നിയുക്ത അമേരിക്കൻ പ്രസിഡന്റ് ജോ ബൈഡൻ ഇന്നലെയാണ് 78ാം പിറന്നാൾ ആഷോഷിച്ചത്. ജനുവരി 20ന് സ്ഥാനമേൽക്കുന്നതോടെ അമേരിക്കൻ ചരിത്രത്തിലെ ഏറ്റവും പ്രായമേറിയ പ്രസിഡന്റ്​ എന്ന റെക്കോഡ് ബൈഡന് സ്വന്തമാകും.

പ്രസിഡന്റ്​ പദവിയിലെത്തിയ ഏറ്റവും പ്രായമേറിയ വ്യക്​തി ഡൊണൾഡ്​ ട്രംപായിരുന്നു. സത്യപ്രതിജ്ഞ ചെയ്യുമ്പോൾ 70 വയസായിരുന്നു അദ്ദേഹത്തിന്റെ പ്രായം.

തിരഞ്ഞെടുപ്പ്​ പ്രചാരണങ്ങളിൽ തന്നെക്കാൾ നാല്​ വയസ് മാത്രം കൂടുതലുള്ള ബൈഡനെ പലപ്പോഴായി​ ട്രംപ് കടന്നാക്രമിച്ചത്​ പ്രായം ചൂണ്ടിക്കാട്ടിയായിരുന്നു. ബൈഡനെ 'ഉറക്കംതൂങ്ങി ജോ' എന്ന ഇരട്ടപ്പേരിലായിരുന്നു ട്രംപ്​ അഭിസംബോധന ചെയ്തിരുന്നത്. എന്നാൽ, പ്രായക്കൂടുതൽ അമേരിക്കയെ നയിക്കുന്നതിന് തനിയ്ക്ക് തടസം സൃഷ്ടിക്കുന്നില്ലെന്നാണ് ബൈഡൻ പറയുന്നത്. ഇപ്പോഴും താൻ പൂർണ ആരോഗ്യവാനാണെന്നും അദ്ദേഹം കൂട്ടിച്ചേർത്തു.

 1980ൽ പ്രസിഡന്റ് പദവിയിലേറിയ റൊണാൾഡ്​ റീഗനായിരുന്നു ട്രംപിന്​ മുമ്പ്​ ഏറ്റവും പ്രായമേറിയ അമേരിക്കൻ പ്രസിഡന്റ്​. പ്രസിഡന്റാകുമ്പോൾ 69 വയസായിരുന്നു അദ്ദേഹത്തിന്റെ പ്രായം.

 43ാം വയസിലാണ് ജോൺ.എഫ്. കെന്നഡി അമേരിക്കൻ പ്രസിഡന്റാകുന്നത്. തിരഞ്ഞെടുക്കപ്പെട്ട ഏറ്റവും പ്രായം കുറഞ്ഞ പ്രസിഡന്റാണ് അദ്ദേഹം. 1963 നവംബർ 22ന്​ കൊല്ലപ്പെടുമ്പോൾ 46 വയസായിരുന്നു കെന്നഡിയുടെ പ്രായം.

വില്യം മക്കിൻലിയുടെ മരണത്തിന്​ ശേഷം 42ാം വയസിൽ തിയോഡോർ റൂസ്​വെൽറ്റ് പ്രസിഡന്റായി സ്ഥാനമേറ്റിരുന്നു.