ഇൻഡോർ: മദ്ധ്യപ്രദേശ് മന്ത്രിയുടെ അത്താഴ വിരുന്നിനുള്ള ക്ഷണം നിരസിച്ചതിനെ തുടർന്ന് ബോളിവുഡ് നടി വിദ്യാബാലൻ അഭിനയിക്കുന്ന സിനിമയുടെ ഷൂട്ടിംഗ് തടഞ്ഞതായി ആരോപണം.

'ഷേർണി' എന്ന ചിത്രത്തിന്റെ ഷൂട്ടിംഗാണ് മുടങ്ങിയത്. വനമേഖലയിലെ ചിത്രീകരണത്തിനായി കഴിഞ്ഞ കുറച്ച് ആഴ്ചകളായി വിദ്യാബാലൻ മദ്ധ്യപ്രദേശിലുണ്ട്.

ഇതിനിടയിലാണ് മദ്ധ്യപ്രദേശ് പ്രവാസികാര്യമന്ത്രി വിജയ് ഷാ, വിദ്യാ ബാലനെ അത്താഴവിരുന്നിന് ക്ഷണിച്ചത്. വിദ്യ ക്ഷണം നിരസിച്ചു. തൊട്ടടുത്ത ദിവസം വനമേഖലയിലേക്ക് ഷൂട്ടിംഗിനായി പോയ പ്രൊഡക്ഷൻ സംഘത്തിന്റെ വാഹനങ്ങൾ വനംവകുപ്പ് തടഞ്ഞു. രണ്ടു വാഹനങ്ങൾ മാത്രമേ അനുവദിക്കാനാവൂവെന്ന് ഡി.എഫ്.ഒ അറിയിച്ചതോടെ ഷൂട്ടിംഗ് മുടങ്ങി. എന്നാൽ ആരോപണം മന്ത്രി നിഷേധിച്ചു.

'താനാണ് അത്താഴവിരുന്നിനുള്ള ക്ഷണം നിരസിച്ചതെന്നും മഹാരാഷ്ട്രയിൽ ചെല്ലുമ്പോൾ കാണാമെന്ന് അറിയിച്ചിരുന്നുവെന്നും' മന്ത്രി പറഞ്ഞു.