ക്വലാലംപൂർ: ലോകത്ത് ആദ്യമായി കൊവിഡ് ആന്റിബോഡിയുമായി ഒരു കുട്ടി ജനിച്ചതായി റിപ്പോർട്ട്. സിംഗപ്പൂർ സ്വദേശിയായ സെലിൻ എൻ‌ജി-ചാൻ എന്ന യുവതിയ്ക്കാണ് കുഞ്ഞ് ജനിച്ചിരിക്കുന്നത്.

ഗർഭിണിയായിരിക്കെ മാർച്ചിൽ സെലിന് കൊവിഡ് ബാധിച്ചിരുന്നു.

ഗർഭകാലത്ത് കൊവിഡ് ആന്റിബോഡികൾ കുഞ്ഞിലേക്ക് കൈമാറിയതായിരിക്കുമെന്നാണ് എന്റെ ഡോക്ടർ സംശയിക്കുന്നത് - സെലിൻ എൻ‌ജി പറഞ്ഞു.
കൊവിഡ് ബാധയുള്ളപ്പോൾ ഗർഭകാലത്തോ പ്രസവത്തിനിടയിലോ ഗർഭ പിണ്ഡത്തിലേക്കോ കുഞ്ഞിലേക്കോ വൈറസ് പകരാൻ കഴിയുമോ എന്ന് ഇതുവരെ അറിവായിട്ടില്ലെന്ന് ലോകാരോഗ്യ സംഘടന വ്യക്തമാക്കി.
രോഗബാധ കണ്ടെത്തി ഒരു വർഷത്തിനിടെ ഇതുവരെ ഒരാളിലും ഗർഭസ്ഥ ശിശുവിന് ചുറ്റുമുള്ള ദ്രാവകത്തിന്റെ സാമ്പിളുകളിലോ മുലപ്പാലിലോ വൈറസിന്റെ സാന്നിദ്ധ്യം കണ്ടെത്തിയിട്ടില്ല.അതേസമയം, കൊവിഡുള്ള സ്ത്രീകൾക്ക് ജനിക്കുന്ന കുഞ്ഞുങ്ങളിൽ കൊവിഡ് ആന്റിബോഡികൾ കണ്ടെത്തുന്നത് കുറവാണെന്ന് ചൈനയിലെ ഡോക്ടർമാർ റിപ്പോർട്ട് ചെയ്തതായി എമർജിംഗ് സാംക്രമിക രോഗങ്ങൾ എന്ന ജേണലിൽ ഒക്ടോബറിൽ പ്രസിദ്ധീകരിച്ച ലേഖനത്തിൽ പറയുന്നു. കുട്ടികളിൽ ഈ ആന്റിബോഡികൾ നിലനിൽക്കുന്നില്ലെന്നാണ് ഇവർ അവകാശപ്പെടുന്നത്.

അമ്മമാരിൽ നിന്ന് നവജാതശിശുക്കളിലേക്ക് കൊവിഡ് പകരുന്നത് വളരെ അപൂർവമാണെന്ന് ന്യൂയോർക്ക്-പ്രെസ്ബൈറ്റീരിയൻ / കൊളംബിയ യൂണിവേഴ്സിറ്റി ഇർവിംഗ് മെഡിക്കൽ സെന്ററിലെ ഡോക്ടർമാർ ഒക്ടോബറിൽ ജാമ പീഡിയാട്രിക്സിൽ റിപ്പോർട്ട് ചെയ്തിരുന്നു.