ശ്രീനഗർ: നിയന്ത്രണരേഖയിൽ വീണ്ടും പ്രകോപനവുമായി പാകിസ്ഥാൻ. അതിർത്തിയോട് ചേർന്നുള‌ള ഭാഗത്ത് പാക് യുദ്ധവിമാനം കണ്ടെത്തി. കാശ്‌മീരിലെ പൂഞ്ച് ജില്ലയിലെ അതിർത്തിയിലാണ് വിമാനം കണ്ടത്. അതിർത്തികളിൽ നിന്ന് 10 കിലോമീ‌റ്റർ ചു‌റ്റളവിൽ യുദ്ധവിമാനങ്ങൾ പറത്താൻ പാടില്ലെന്ന അന്താരാഷ്‌ട്ര നിയമത്തിന്റെ ലംഘനമാണ് പാകിസ്ഥാന്റേതെന്ന് പ്രതിരോധ വക്താവ് പറഞ്ഞു. ഈയടുത്ത കാലത്ത് ഇവിടെ പാക് നിർമ്മിത ഡ്രോണുകൾ കണ്ടെത്തിയിരുന്നുവെന്നും സൈനിക വൃത്തങ്ങൾ അറിയിച്ചു.
വെള‌ളിയാഴ്ച പാകിസ്ഥാൻ നടത്തിയ വെടിനിറുത്തൽ ലംഘനത്തിൽ രണ്ട് സൈനികർ വീരമൃത്യു വരിച്ചിരുന്നു. രജൗരി ജില്ലയിലെ സുന്ദർബനി സെക്‌ടറിലായിരുന്നു അന്ന് ആക്രമണം നടന്നത്. ഇതിന് ഇന്ത്യ ശക്തമായ തിരിച്ചടി നൽകി.