പാലക്കാട്: കൊവിഡ് വ്യാപനത്തെ തുടർന്ന് നിലച്ച ട്രെയിൻ സർവീസുകൾ തുടങ്ങുന്നതിന്റെ ഭാഗമായി റിസർവേഷൻ പുനഃരാരംഭിച്ചു. ഡിവിഷൻ പരിധിയിൽ പാലക്കാട് ടൗൺ, അങ്ങാടിപ്പുറം, ഷൊർണൂർ, ഫറോക്ക്, പയ്യന്നൂർ, മാഹി, കങ്കനാടി എന്നിവിടങ്ങളിലാണ് റിസർവേഷൻ പുനഃരാംഭിച്ചത്. രാവിലെ എട്ടുമുതൽ ഉച്ചക്ക് രണ്ട് വരെയാണ് ഇവയുടെ പ്രവർത്തനം. നിലവിൽ പാലക്കാട് ഡിവിഷന് കീഴിൽ 21 ജോഡി പ്രത്യേക ട്രെയിനുകളാണ് ഓടുന്നത്.

വെള്ളിയാഴ്ച മുതൽ ജാംനഗർ- തിരുനെൽവേലി ട്രെയിനും ഓടി തുടങ്ങും. 11 ട്രെയിനുകൾ ദിവസേന ഓടുമ്പോൾ ബാക്കി ആഴ്ചയിൽ ഓരോ സർവീസ് വീതവും നടത്തും. അടുത്തുതന്നെ തിരുചെന്തൂർ, അമൃത, രാജ്യറാണി എക്സ്‌പ്രസുകൾ സർവീസ് ആരംഭിക്കും.

ഇതിന് പുറമെ തമിഴ്‌നാട്ടിലേക്കും കേരളത്തിലേക്കുമായി മൂന്ന് പ്രത്യേക ട്രെയിൻ ഓടിക്കുന്നതും ആലോചനയുണ്ട്. നിലവിൽ പ്ലാറ്റ് ഫോം ടിക്കറ്റുകളോ സാധാരണ ടിക്കറ്റുകളോ ലഭിക്കില്ല. റിസർവേഷൻ ടിക്കറ്റുകൾ മാത്രമേ അനുവദിക്കൂ. സ്റ്റേഷനുകളിൽ പ്ലാറ്റ് ഫോമിലേക്ക് പ്രവേശിക്കുന്ന ഭാഗത്ത് ടിക്കറ്റുകൾ പരിശോധിച്ചേ അകത്തേക്ക് കടത്തി വിടൂ. യാത്ര അയക്കാനെത്തുന്നവർക്ക് പ്ലാറ്റ് ഫോമിലേക്ക് പ്രവേശനം അനുവദിക്കില്ല.