പാലക്കാട്: സ്വർണക്കടത്ത് കേസിൽ പ്രതികളുടെ മൊഴികൾ വാർത്തയാവുന്നത് ഗുരുതര വീഴ്ചയാണെന്നും, ഇത് സുപ്രീംകോടതി വിധിക്കെതിരാണെന്നും മന്ത്രി എ.കെ.ബാലൻ പറഞ്ഞു.

മൊഴികൾ എങ്ങിനെയാണ് പുറത്തു വരുന്നത്? അന്വേഷണ ഏജൻസികൾ ഇക്കാര്യം ഗൗരവമായി കാണണം. അന്വേഷണ ഏജൻസികളിൽ ഏത് തരത്തിലാണ് ബി.ജെ.പിയും കോൺഗ്രസും സ്വാധീനം ചെലുത്തുന്നുവെന്നതിന്റെ തെളിവാണിത്. എല്ലാ കള്ള പ്രചരണങ്ങളും ഇടതുപക്ഷം ജനങ്ങൾക്ക് മുന്നിൽ തുറന്ന് കാട്ടും.ബി.ജെ.പിയുടെയും കോൺഗ്രസിന്റെയും ഓലപ്പാമ്പ് കണ്ടു പേടിക്കുന്നവരല്ല കേരളത്തിലെ ഇടതുപക്ഷവും കമ്മ്യൂണിസ്റ്റുകാരും. തോക്ക് കാണിച്ചിട്ട് പേടിക്കാത്തവരെ ഉലക്ക കാണിച്ച് പേടിപ്പിക്കേണ്ടെന്നും മന്ത്രി പറഞ്ഞു.