കോന്നി: സമഗ്ര വികസന പദ്ധതിയുടെ ഭാഗമായി കോന്നി താലൂക്ക് ആശുപത്രിയിൽ സ്ഥാപിച്ച വെന്റിലേറ്റർ സൗകര്യമുള്ള ഐ.സി.യുവിന്റെ ഉദ്ഘാടനം കെ.യു.ജനീഷ് കുമാർ എം.എൽ.എ നിർവഹിച്ചു.
എം.എൽ.എ ഫണ്ടിൽ നിന്നും 24 ലക്ഷം രൂപ മുടക്കിയാണ് രണ്ട് വെന്റിലേറ്റർ വാങ്ങി നല്കിയത്. ഐ.സി.യു കിടക്കയും, മറ്റ് അനുബന്ധ സൗകര്യങ്ങളും എൻ.എച്ച്.എം ആണ് നല്കിയത്. ഐ.സി.യു പ്രവർത്തനമാരംഭിച്ചതോടെ വെന്റിലേറ്റർ സൗകര്യമുള്ള ജില്ലയിലെ രണ്ടാമത്തെ താലൂക്ക് ആശുപത്രിയായി കോന്നി മാറി. ബ്ലോക്ക് പഞ്ചായത്ത് പ്രസിഡന്റ് കോന്നിയൂർ പി.കെ അദ്ധ്യക്ഷത വഹിച്ചു.പഞ്ചായത്തംഗം പി.ഗീത, താലൂക്ക് ആശുപത്രി സൂപ്രണ്ട് ഇൻചാർജ്ജ് ഡോ: എം.ടി.സിമി, ആർ.എം.ഒ ഇൻ ചാർജ് ഡോ.അജയ് ഏബ്രഹാം, ഹെഡ് നേഴ്സ് എസ്.ശ്രീലത തുടങ്ങിയവർ പങ്കെടുത്തു.