ആലപ്പുഴ: കാറിൽ ഒളിപ്പിച്ച് കടത്താൻ ശ്രമിച്ച 25 കിലോ കഞ്ചാവുമായി മൂന്ന് യുവാക്കളെ ആലപ്പുഴ നോർത്ത് പൊലീസ് പിടികൂടി. പാതിരപ്പള്ളി പെട്രോൾ പമ്പിന് സമീപം ഇന്നോവ കാറിൽ നിന്നാണ് കഞ്ചാവ് കണ്ടെടുത്തത്. ചെങ്ങന്നൂർ മുളക്കുഴ കാരക്കാട്ട് ഉല്ലാസ് ഭവനത്തിൽ അനന്തു(24),തിട്ടമേൽ അർച്ചന ഭവനിൽ കെ.പി അരുൺ(24), മുളക്കുഴ കുന്നത്ത് പുരയിടം രാഹുൽ(കണ്ണൻ-27) എന്നിവരാണ് പിടിയിലായത്. ബംഗളൂരുവിൽ നിന്ന് ചെങ്ങന്നൂരിലേയ്ക്ക് കടത്തുകയായിരുന്ന കഞ്ചാവാണ് രഹസ്യവിവരത്തിന്റെ അടിസ്ഥാനത്തിൽ നോർത്ത് എസ്.ഐ ടോൾസൻ ജോസഫിന്റെ നേതൃത്വത്തിലുള്ള സംഘം പിടിച്ചെടുത്തത്. 11 പായ്ക്കറ്റുകളിലാക്കിയ നിലയിലായിരുന്നു കഞ്ചാവ്. പ്രതികളെ ഇന്ന് കോടതിയിൽ ഹാജരാക്കും.