പത്തനംതിട്ട : കേന്ദ്ര സർക്കാർ നയങ്ങൾക്കെതിരെ നാളെ നടക്കുന്ന പണിമുടക്കിൽ എൻ.ജി.ഒ അസോസിയേഷൻ നേതൃത്വം കൊടുക്കുന്ന സെറ്റോ, യു.ടി.ഇ.എഫ് സംഘടനകൾ പങ്കെടുക്കില്ലന്ന് ജില്ലാ പ്രസിഡന്റ് സുരേഷ് കുഴിവേലിൽ, സെക്രട്ടറി അജിൻ ഐപ്പ് ജോർജ്ജ് എന്നിവർ അറിയിച്ചു. കേന്ദ്ര സർക്കാരിന്റെ തൊഴിലാളി വിരുദ്ധ നിലപാടുകൾ തന്നെയാണ് കേരള സർക്കാരും സ്വീകരിക്കുന്നത്. ഇത് കണ്ടില്ലെന്ന് നടിച്ച് കേന്ദ്ര സർക്കാരിനെതിരെ മാത്രമാണ് ഒരു വിഭാഗം ജീവനക്കാരും അദ്ധ്യാപകരും സമരം ചെയ്യുന്നത്. ഇത് സംസ്ഥാന ജിവനക്കാർക്കും അദ്ധ്യാപകർക്കും അംഗീകരിക്കാനാവില്ല. ശമ്പള പരിഷ്‌ക്കരണം, ക്ഷാമബത്ത, പിൻവാതിൽ നിയമനങ്ങൾ തുടങ്ങിയ വിഷയങ്ങളിൽ ഇടത് സർവീസ് സംഘടനകൾ മൗനം പാലിക്കുകയാണ്. കൊവിഡിന്റെയും തദ്ദേശഭരണ സ്ഥാപനങ്ങളിലേക്കുള്ള തിരഞ്ഞെടുപ്പിന്റയും പശ്ചാത്തലത്തിൽ പണിമുടക്ക് നടത്താൻ അനുകൂലമായ സാഹചര്യമല്ല ഇപ്പോഴുള്ളത്. കേന്ദ്ര, സംസ്ഥാന സർക്കാരുകൾക്കെതിരെ ജീവനക്കാരുടെ യോജിച്ചുള്ള സമരം ജനുവരിയിൽ നടത്തുമെന്ന് സുരേഷ് കുഴവേലിലും അജിൻ ഐപ്പ് ജോർജും അറിയിച്ചു.