പത്തനംതിട്ട : തദ്ദേശ സ്വയംഭരണതിരഞ്ഞെടുപ്പിൽ പത്തനംതിട്ട ജില്ലാ പഞ്ചായത്ത് തിരഞ്ഞെടുപ്പിനുള്ള വോട്ടിംഗ് മെഷീനുകളിൽ പതിപ്പിക്കുന്ന ബാലറ്റ് ലേബലുകൾ, പോസ്റ്റൽ വോട്ടിനുള്ള ബാലറ്റ് പേപ്പറുകൾ എന്നിവ കളക്ടറേറ്റിൽ എത്തിച്ചു. ജില്ലാ കളക്ടർ പി.ബി നൂഹിന്റെ നേതൃത്വത്തിൽ കളക്ടറേറ്റിൽ ഇവയുടെ പരിശോധന നടത്തി.
തിരുവനന്തപുരം മണ്ണന്തല ഗവ.പ്രസിൽ അച്ചടിച്ച 92,820 ബാലറ്റുകളാണ് 16 പെട്ടികളിലായി എത്തിയിട്ടുള്ളത്. 66,300 പോസ്റ്റൽ ബാലറ്റുകൾ, 19,890 ടെൻഡേർഡ് ബാലറ്റുകൾ, ബാലറ്റ് യൂണിറ്റിൽ ഉപയോഗിക്കുന്ന 6630 ബാലറ്റ് എന്നിവയുൾപ്പടെയാണ് 92,820 ബാലറ്റുകൾ എത്തിയത്.
എട്ടു ടീമുകളായി തിരിഞ്ഞാണു പരിശോധന നടത്തുന്നത്. പരിശോധന പൂർത്തിയായതിനു ശേഷം ബാലറ്റുകൾ അതത് ബ്ലോക്ക് റിട്ടേണിംഗ് ഓഫീസർമാർക്ക് കൈമാറും.