കുന്നത്തൂർ : പോരുവഴി പഞ്ചായത്തിലെ ഏറെ തിരക്കുള്ള ഇടയ്ക്കാട് മാർക്കറ്റ് ജംഗ്ഷനിലെത്തുന്നവർ മൂത്രശങ്കയകറ്റാൻ പൊതു ടോയ്ലറ്റുകളില്ലാതെ ബുദ്ധിമുട്ടുന്നു. മാർക്കറ്റ് ജംഗ്ഷനിലെ എ.ടി.എം, മാവേലി സ്റ്റോർ, സർക്കാർ ഓഫീസുകൾ, വ്യാപാര സ്ഥാപനങ്ങൾ എന്നിവിടങ്ങളിലെത്തുന്ന യാത്രക്കാരും ഓട്ടോ ടാക്സി ഡ്രൈവർമാരും ഉൾപ്പടെ നൂറുകണക്കിനാളുകളാണ് ടോയ്ലറ്റില്ലാത്തതിനാൽ വലയുന്നത്. പൊതു ശൗചാലയത്തിനായി പഞ്ചായത്ത് ഭരണസമിതി 2018ൽ ഷോപ്പിംഗ് കോംപ്ലക്സിനോട് ചേർന്നുള്ള സ്ഥലം കണ്ടെത്തി. ഷോപ്പിംഗ് കോംപ്ലക്സിന്റെ അറ്റകുറ്റപ്പണിക്കും ടോയ്ലറ്റ് നിർമ്മാണത്തിനുമായി മൂന്ന് ലക്ഷം രൂപയ്ക്ക് പഞ്ചായത്ത് കരാർ നൽകി. എന്നാൽ നിർമ്മാണ പ്രവർത്തനങ്ങൾ ആരംഭിച്ചെങ്കിലും വൈദ്യുതി കണക്ഷനും പ്ലംബ്ബിംഗുമടക്കമുള്ള ജോലികൾ പൂർത്തീകരിക്കാതെ പാതി വഴിയിൽ ഉപേക്ഷിച്ച നിലയിലാണ്. പൊതു ടോയിലറ്റിന്റെ നിർമ്മാണം ഉടൻ പൂർത്തീകരിച്ച് പൊതുജനങ്ങൾക്കായി തുറന്ന് നൽകണമെന്നാണ് ഇടയ്ക്കാട് ജംഗ്ഷനിലെ ഓട്ടോ ഡ്രൈവർമാരുടെയും വ്യാപാര ഉടമകളുടെയും ആവശ്യം.