കൊല്ലം: വിശ്വാസ്യത നഷ്ടപ്പെട്ട ബാലാവകാശ കമ്മിഷൻ ചെയർമാനെ പിരിച്ചുവിടണമെന്ന് ജവഹർ ബാൽ മഞ്ച് നാഷണൽ ഡയറക്ടർ ഡോ. ജി.വി. ഹരി ആവശ്യപ്പെട്ടു. ജവഹർ ബാൽ മഞ്ച് ശിശുദിനാഘോഷ പരിപാടികൾ കൊല്ലം ഡി.സി.സി ഹാളിൽ ഉദ്ഘാടനം ചെയ്യുകയായിരുന്നു അദ്ദേഹം. ഭരണഘടനാപരമായി സ്ഥാപിതമായ ഇത്തരം സ്ഥാപനങ്ങളുടെ നിലനിൽപ്പ് അതിന്റെ വിശ്വാസ്യതയിലാണ്. എന്നാൽ ബാലാവകാശ കമ്മിഷൻ രാഷ്ട്രീയ ലാഭത്തിന് വേണ്ടി പ്രവർത്തിച്ചതിന്റെ തെളിവാണ് കോടിയേരിയുടെ വീട്ടിൽ ചെറുമകനെ സംരക്ഷിക്കുവാൻ നടത്തിയ ഇടപെടലെന്ന് അദ്ദേഹം ആരോപിച്ചു.

ഡി.സി.സി പ്രസിഡന്റ് ബിന്ദുകൃഷ്ണ നെഹ്റു അനുസ്മരണ പ്രഭാഷണം നടത്തി. കെ.പി.സി.സി ജനറൽ സെക്രട്ടറി ഷാനവാസ് ഖാൻ മുഖ്യപ്രഭാഷണം നടത്തി. കുട്ടികളുടെ പ്രതിനിധിയായി തിരഞ്ഞെടുക്കപ്പെട്ട എൻ. നദീന അദ്ധ്യക്ഷത വഹിച്ചു. ജില്ലാ ചെയർമാൻ സുമൻജിത്ത് മിഷ ആമുഖപ്രഭാഷണം നടത്തി. മുൻ കൗൺസിലർ ഡി. ഗീതാകൃഷ്ണൻ, നാഷണൽ ഫെസിലിറ്റേറ്റർ അളക ആർ. തമ്പി, ജില്ലാ വൈസ് ചെയർമാന്മാരായ എൻ. രാജു, ചിത്രലേഖ, ജില്ലാ കോ ഓർഡിനേറ്റർമാരായ ബി. ഉണ്ണി, സനൂപ്, വിനോദ് പിച്ചിനാട്, പ്രിയദർശൻ, മോഹനൻ എന്നിവർ സംസാരിച്ചു. ജില്ലയിൽ ശിശു ദിനാഘോഷത്തോടനുബന്ധിച്ച് നടന്ന ബാലകേളി ഓൺലൈൻ കലോത്സവ വിജയികൾക്കുള്ള സമ്മാനങ്ങൾ ചടങ്ങിൽ വിതരണം ചെയ്തു.