തെക്കൻ ചൈനയിൽ ഷിലിൻ എന്നറിയപ്പെടുന്ന പുരാതന ചൈനീസ് വനമുണ്ട്. സഞ്ചാരികളെ ആകർഷിക്കുന്ന ഈ വനത്തിന് ഒരു സവിശേഷതയുമുണ്ട്. ഇത് ഒരു സാധാരണ വനമല്ല, മരങ്ങൾക്കും കാടുകൾക്കും പകരം ഇടതൂർന്ന പാറക്കൂട്ടങ്ങൾ നിറഞ്ഞ വനമാണ് ഷിലിൻ. ലോകമെമ്പാടുമുള്ള സഞ്ചാരികളെ ഇവിടേക്ക് ആകർഷിക്കുന്നതും ഈ ചുണ്ണാമ്പ് കല്ലുകളാൽ നിറഞ്ഞ വനമാണ്. രാജ്യത്ത് ഏറ്റവുമധികം ആളുകൾ എത്തുന്ന പ്രദേശങ്ങളിൽ ഒന്നായ ഈ വനം ഏകദേശം 270 ദശലക്ഷം വർഷങ്ങൾക്ക് മുമ്പ് രൂപീകരണം ആരംഭിച്ചതാണ്.

ആയിരക്കണക്കിന് ചുണ്ണാമ്പ് കല്ലുകൾ വളർന്നുനിൽക്കുന്ന ഈ വനത്തിൽ കല്ലുകൾക്ക് ഇടയിലായി ഇടതൂർന്ന് നിൽക്കുന്ന മരങ്ങളും ഇവിടെയെത്തുന്ന സഞ്ചാരികളുടെ കാഴ്ചയ്ക്ക് മോടി കൂട്ടൂന്നുണ്ട്. കല്ല് വനങ്ങൾ, കാർസ്റ്റ് ഗുഹകൾ, വെള്ളച്ചാട്ടങ്ങൾ, ഭൂഗർഭ നദികൾ ഉൾപ്പെടെ 1,100 ചതുരശ്ര കിലോമീറ്ററാണ് ഈ പ്രദേശം. ചുണ്ണാമ്പുകല്ല്, ഡോളമൈറ്റ്, ജിപ്സം തുടങ്ങിയവ ഒത്തുചേർന്ന് ഉണ്ടാകുന്ന ഒരു തരം ലാൻഡ്സ്‌കേപ്പാണ് കാർസ്റ്റ് വനം. പല വലിപ്പത്തിലുള്ള കല്ലുകളും പാറകളുമായി നിൽക്കുന്ന ഈ വനപ്രദേശം ഇവിടെ എത്തുന്നവർക്ക് പുതിയ കാഴ്ചയാണ് സമ്മാനിക്കുന്നത്. നിരവധി സവിശേഷതകളാൽ സമ്പന്നമായ ഈ കല്ല് വനം ലോകത്ത് ഇവിടെ മാത്രമാണുള്ളത്. അതുകൊണ്ടുതന്നെ ലോകത്തിലെ ഏറ്റവും അസാധാരണമായ സ്ഥലങ്ങളുടെ പട്ടികയിൽ ഇടം പിടിച്ച ഒരിടമാണ് സ്റ്റോൺ ഫോറസ്റ്ര്.