പാവറട്ടി: തദ്ദേശ ഭരണ തിരഞ്ഞടുപ്പിൽ ബുധനാഴ്ച നാമ നിർദ്ദേശ പത്രിക സമർപ്പിക്കാനിരിക്കെ പാവറട്ടിയിൽ സ്ഥാനാർത്ഥി ഹൃദയാഘാതം മൂലം മരിച്ചു. കേരള കോൺഗ്രസ് (ജോസഫ്) ദളിത് ഫ്രണ്ട് ജില്ലാ സെക്രട്ടറി പാവറട്ടി ചെറാട്ടി വീട്ടിൽ പരേതനായ ചെറിയ അയ്യപ്പന്റെ മകൻ സുനിലാണ് (49) മരിച്ചത്.

പാവറട്ടി പഞ്ചായത്തിൽ 14-ാം വാർഡിൽ കേരള കോൺഗ്രസിന്റെ (ജോസഫ്) സ്ഥാനാർത്ഥിയാണ്. പ്രചരണത്തിനു ശേഷം ബുധനാഴ്ച നാമനിർദേശ പത്രിക സമർപ്പിക്കാനുള്ള രേഖകൾ ശരിയാക്കി ഉച്ചയ്ക്ക് വീട്ടിലെത്തി ഭക്ഷണം കഴിച്ച് കിടന്നു. ഏറെ നേരം കഴിഞ്ഞ് എഴുന്നേൽക്കാതായപ്പോൾ ഉടൻ ചാവക്കാട് സ്വകാര്യ ആശുപത്രിയിൽ എത്തിച്ചെങ്കിലും മരിച്ച നിലയിലായിരുന്നു.

കലാമുറ്റം കലാവേദിയുടെ സജീവ പ്രവർത്തകനും അമേച്വർ നാടക നടനുമായിരുന്നു. സംസ്‌കാരം കൊവിഡ് പരിശോധനകൾക്ക് ശേഷം ബുധനാഴ്ച സംസ്‌കരിക്കും. പരേതയായ നീലിക്കുട്ടിയാണ് അമ്മ. ഭാര്യ: പ്രിയ. മക്കൾ: ദീപക്, ദേവിക, ദീപ്തി.