സ്വതന്ത്രൻ ഉൾപ്പടെ നാലു പേർ മത്സര രംഗത്ത്
തൃശൂർ : സ്ഥാനാർത്ഥി ചിത്രം തെളിഞ്ഞതോടെ വാഴാനി ഡിവിഷനിൽ പോരാട്ടം കടുക്കുന്നു. മൂന്നു മുന്നണികളും പ്രചാരണ രംഗത്ത് സജീവമായി. എൽ.ഡി.എഫും, യു.ഡി.എഫും മുൻ പഞ്ചായത്ത് പ്രസിഡന്റ്മാരെ രംഗത്തിറക്കി മത്സരം കൊഴുപ്പിക്കുമ്പോൾ ബി.ജെ.പി രംഗതിരക്കിയിരിക്കുന്നത് ഒ.ബി. സി മോർച്ചയുടെ സംസ്ഥാന നേതാവിനെ തന്നെയാണ്. ഇതിനു പുറമെ സ്വതന്ത്രനായി സന്ദീപ്. പി. ഗോപിയും മത്സരം രംഗത്തുണ്ട് . മാടക്കത്തറ, തെക്കുംകര പഞ്ചായത്തുകൾ പൂർണ്ണമായും മുളങ്കുന്നത്ത്കാവ്, പാണഞ്ചേരി പഞ്ചായത്തുകളിലെ എതാനും വാർഡുകളും ഉൾപ്പെടുന്നതാണ് വാഴാനി.
മാടക്കത്തറ പഞ്ചായത്ത് പ്രസിഡന്റ് പി.എസ് വിനയൻ എൻ.ഡി.എഫിനായി കളംപിടിക്കാൻ രംഗത്തിറങ്ങുമ്പോൾ മുൻ കോലഴി പഞ്ചായത്ത് പ്രസിഡന്റ് എൻ.എ സാബു യു.ഡി.എഫിനായും ഒ.ബി.സി മോർച്ച സംസ്ഥാന വൈസ് പ്രസിഡന്റ് റിഷി പൽപ്പു എൻ.ഡി.എയ്ക്കായും മത്സരിക്കുന്നു. കഴിഞ്ഞ തവണ വനിതാ സംവരണമായിരുന്ന വാഴാനിയിൽ നിന്ന് വിജയിച്ച എൽ.ഡി.എഫിലെ മേരി തോമസ് ജില്ലാ പഞ്ചായത്ത് പ്രസിഡന്റായി. ഇത്തവണയും സീറ്റ് നിലനിറുത്താനാകുമെന്ന് എൽ.ഡി.എഫ് പ്രതീക്ഷിക്കുന്നു. എന്നാൽ എല്ലാ മുന്നണികൾക്കും വ്യക്തമായ സ്വാധീനമുള്ള ഡിവിഷനാണ് വാഴാനി. മാടക്കത്തറ പഞ്ചായത്ത് പ്രസിഡന്റ് എന്ന നിലയിൽ മികച്ച പ്രവർത്തനം കാഴ്ച്ച വച്ചതിന്റെ അംഗീകാരം കൂടിയാണ് വിനയന്റെ ജില്ലാ പഞ്ചായത്ത് സ്ഥാനാർത്ഥിത്വം. മുൻ ഡി.വൈ.എഫ്.ഐ നേതാവുമാണ്. കോലഴി പഞ്ചായത്ത് സ്റ്റാൻഡിംഗ് കമ്മിറ്റി ചെയർമാൻ, വൈസ് പ്രസിഡന്റ്, പ്രസിഡന്റ് തുടങ്ങി നിരവധി വർഷത്തെ പ്രവർത്തന പരിചയത്തോടെയാണ് സാബു പോര് കടുപ്പിക്കുന്നത്. യു.ഡി.എഫ് വടക്കാഞ്ചേരി നിയോജക മണ്ഡലം ചെയർമാനുമാണ്. ബി.ജെ.പി മുൻ വ്യവസായ സെൽ കൺവീനറും നാഷ‌ണൽ എംപ്ലോയീസ് ഫെഡറേഷൻ സംസ്ഥാന പ്രസിഡന്റുമാണ് റിഷി പൽപ്പു. . കൊവിഡിൽ ഓൺലൈൻ വിദ്യാഭ്യാസത്തിന് സൗകര്യമില്ലാത്ത വിദ്യാർത്ഥികൾക്ക് ടാബ് ഉൾപ്പെടെ വിതരണം ചെയ്തും ഭക്ഷ്യക്കിറ്റുകൾ വിതരണം ചെയ്തും പൊതുപ്രവർത്തനത്തിൽ സജീവമായിരുന്നു. ആ പ്രവർത്തനങ്ങൾ തുണയാകുമെന്ന ആത്മവിശ്വാസത്തിലാണ് റിഷി പൽപ്പുവും.
പ്രചാരണം
മൂന്നു മുന്നണികളും വാർഡ് തല കൺവെൻഷനുകളിൽ പങ്കെടുത്തും പ്രധാന കേന്ദ്രങ്ങളിൽ എത്തി വോട്ടു അഭ്യർത്ഥിനയും പൂർത്തിയാക്കി. പോസ്റ്റാറുകളും ചുമരെഴുതുകളും നിറഞ്ഞു തുടങ്ങി.
വാഴാനി ഡിവിഷൻ
തെക്കുംകര, മാടക്കത്തറ പഞ്ചായത്തുകൾ പൂർണ്ണമായി മുളങ്കുന്നത്ത് കാവ് പഞ്ചായത്തിലെ 7 വാർഡുകൾ പാണഞ്ചേരി പഞ്ചായത്തിലെ 1, 2, 3 എന്നീ വാർഡുകൾ. മുൻ അംഗം മേരി തോമസ് (ജില്ലാ പഞ്ചായത്ത് പ്രസിഡന്റ്-
എൽ.ഡി.എഫ്) ഭൂരിപക്ഷം -3010