തന്റെ ശരീര സൗന്ദര്യത്തെ കുറിച്ചും ആത്മിവിശ്വാസത്തെ കുറിച്ചുമുള്ള കുറിപ്പുമായി എത്തിയിരിക്കുകയാണ് കനിഹ. പഴയൊരു ഫോട്ടോയ്‌ക്കൊപ്പമാണ് കനിഹയുടെ ഇൻസ്റ്റഗ്രാം പോസ്റ്റ്. "എന്റെ ഒരു പഴയ ചിത്രം തന്നെയാണിത്. നിങ്ങളിൽ പലരെയും പോലെ ഞാനും എന്റെ ചില പഴയ ചിത്രങ്ങൾ എടുത്ത് നോക്കി ഞാനെത്ര മെലിഞ്ഞിട്ടായിരുന്നു, എന്റെ വയർ എത്രമാത്രം ഒട്ടിയതായിരുന്നു, എന്റെ മുടി എത്ര മനോഹരമായിരുന്നു എന്നൊക്കെ ചിന്തിക്കുകയായിരുന്നു. പെട്ടന്ന് എനിക്കൊരു തിരിച്ചറിവ് തോന്നി, ഞാനെന്തിനാണ് ഇങ്ങനെ ചിന്തിക്കുന്നത്. അതിനർത്ഥം ഇപ്പോഴത്തെ എന്റെ സൗന്ദര്യത്തിൽ ഞാൻ സന്തോഷവതിയല്ല എന്നാണോ. ഒരിക്കലുമല്ല. സത്യത്തിൽ പണ്ടത്തേതിലും അധികം ഇന്ന് ഞാൻ എന്നെ ഇഷ്ടപ്പെടുന്നു. എന്റെ ശരീരത്തിലുള്ള ഓരോ പാടുകൾക്കും അടയാളങ്ങൾക്കും ഓരോ മനോഹരമായ കഥകൾ പറയാനുണ്ട് എന്നാണ് എന്റെ വിശ്വാസം. എല്ലാം പഴയത് പോലെ തന്നെയാണെങ്കിൽ അതിലെന്താണ് കഥ. സത്യം അംഗീകരിച്ചുകൊണ്ട് നിങ്ങളുടെ ശരീരത്തെ സ്വയം സ്‌നേഹിക്കുക എന്നതാണ് ഏറ്റവും പ്രധാനം, മറ്റുള്ളവരുമായി നിങ്ങളെ താരതമ്യപ്പെടുത്തുന്നത് ദയവുചെയ്ത് നിർത്തുക. നമുക്കെല്ലാവർക്കും വ്യത്യസ്തമായ കഥകളുണ്ട്. ഞാൻ ചെറുതാണെന്ന് ചിന്തിയ്ക്കുന്നത് നിർത്തൂ. നിങ്ങളുടെ ശരീരം ഇഷ്ടപ്പെട്ടു തുടങ്ങൂ. കനിഹ കുറിച്ചു.