തിരുവനന്തപുരം:അഞ്ച് പേർക്ക് ഒരു കോടി രൂപ വീതം ഒന്നാം സമ്മാനമായി നൽകുന്ന പുതിയ ഭാഗ്യമിത്ര ഭാഗ്യക്കുറി മന്ത്രി തോമസ് ഐസക് തിരുവനന്തപുരത്ത് പ്രകാശനം ചെയ്തു. വി.കെ.പ്രശാന്ത് എം.എൽ.എ ടിക്കറ്റ് ഏറ്റുവാങ്ങി. 100 രൂപ വിലയുള്ള ലോട്ടറി അടുത്ത മാസം ആറിന് നറുക്കെടുക്കും. എല്ലാ മാസവും ആദ്യ ഞായറാഴ്ച നറുക്കെടുക്കുന്ന ഭാഗ്യമിത്ര പ്രതിമാസ ഭാഗ്യക്കുറി ഒന്നാം സമ്മാനം ഒന്നിലധികം പേർക്ക് നൽകുന്ന വിപണിയിലുള്ള ഏക ടിക്കറ്റാണ്.
ഭാഗ്യക്കുറി വകുപ്പിന്റെ പുതിയ വെബ്‌സൈറ്റ് www.statelottery.kerala.gov.in, പുതിയ മൊബൈൽ ആപ്ലിക്കേഷനായ ഭാഗ്യകേരളം, പുതിയ സോഫ്ട്‌വെയർ LOTIS എന്നിവയും മന്ത്രി ഉദ്ഘാടനം ചെയ്തു. നിലവിലെ വെബ്‌സൈറ്റായ www.keralalotteries.com കുറച്ചുനാൾകൂടി പ്രവർത്തിക്കും. ഭാവിയിൽ നറുക്കെടുപ്പ് ഫലം തൽസമയം ലഭ്യമാകുന്ന സംവിധാനം പുതിയ വെബ്‌സൈറ്റിൽ ഉൾപ്പെടുത്തും.
ടിക്കറ്റിലെ ക്യൂ.ആർ കോഡ് സ്‌കാൻ ചെയ്ത് ടിക്കറ്റ് ഒറിജിനലാണോ എന്ന് തിരിച്ചറിയാനും നറുക്കെടുപ്പ് ഫലം അറിയുവാനും സാധിക്കുന്ന ഭാഗ്യകേരളം മൊബൈൽ ആപ്ലിക്കേഷൻ ഗൂഗിൾ പ്ലേസ്റ്റോറിൽ നിന്നു ഡൗൺലോഡ് ചെയ്യാം.
ചടങ്ങിൽ ഭാഗ്യക്കുറി വകുപ്പ് ഡയറക്ടർ അമിത് മീണ, ക്ഷേമനിധി ബോർഡ് ചെയർമാൻ പി.ആർ.ജയപ്രകാശ്, വകുപ്പ് ജോയിന്റ് ഡയറക്ടർമാരായ എസ്.ജി.ശർമ്മ, എം.ആർ.സുധ, പബ്ലിസിറ്റി ഓഫീസർ അനിൽ ഭാസ്‌കർ, എൻ.ഐ.സി സ്റ്റേറ്റ് ഇൻഫർമാറ്റിക്സ് ഓഫീസർ മോഹൻദാസ് എന്നിവർ പങ്കെടുത്തു.