ആറ്റിങ്ങൽ:ഇത്തവണയും ആറ്റിങ്ങൽ ഗവ.കോളേജിലെ വിളവെടുപ്പിന് നൂറ് മേനി.കൊവിഡിനും, ലോക് ഡൗണിനുമൊന്നും കാർഷിക സംസ്കാരത്തെ പിന്നോട്ട് അടിക്കാൻ കഴിയില്ലെന്ന മാതൃക കാട്ടിയിരിക്കുകയാണ് ആറ്റിങ്ങൽ ഗവൺമെന്റ് കോളേജിലെ എൻഎസ്എസ് യൂണിറ്റിന്റെ നേതൃത്വത്തിൽ നടത്തിയ വിളവെടുപ്പ്.തുടർച്ചയായി രണ്ടാം വർഷമാണ് ഇവിടെ നെൽക്കൃഷിക്ക് നൂറ് മേനി വിളവ് ലഭിക്കുന്നത്. ഉമയിനത്തിൽ പെടുന്ന നെല്ലാണ് കൃഷിക്കായി ഉപയോഗിച്ചത്.കഴിഞ്ഞ വർഷം വിദ്യാർത്ഥികളുടെ മുഴുവൻ പങ്കാളിത്തം ഉണ്ടായിരുന്നെങ്കിൽ ഇത്തവണ കൊവി‍ഡ് പ്രതിസന്ധി കാരണം വളരെ കുറച്ചു വിദ്യാർത്ഥികളും തൊഴിലാളികളും ചേർന്നാണ് വിളവിറക്കിയത്.കോളേജിലെ എൻ എസ് എസ് യൂണിറ്റുകൾക്ക് ഒപ്പം സർക്കാർ സംവിധാനം,അദ്ധ്യാപക -അനദ്ധ്യാപക,പി ടി എ എന്നിവരുടെ കൂട്ടായ ശ്രമഫലമാണിതെന്ന് പ്രിൻസിപ്പൽ പറഞ്ഞു.മുൻ പ്രിൻസിപ്പൽ ഡോ.വി.മണികണ്ഠൻ നായരും കോളേജ് പ്രിൻസിപ്പൽ ഡോ.സുനിൽ ജോണും ചേർന്ന് കതിർ കൊയ്ത് ഉദ്‌ഘാടനം ചെയ്തു.എൻഎസ്എസ് പ്രോഗ്രാം ഓഫീസർമാരായ ഡോ.സരുൺ എസ്.ജി,കെ. ഗോപകുമാർ എന്നിവർ നേതൃത്വം നൽകി.കൗൺസിലറും പൂർവ വിദ്യാർത്ഥിയുമായ പ്രിൻസ് രാജ്,പൂർവ വിദ്യാർത്ഥി സംഘടനയായ നൊസ്റ്റാൾജിയയുടെ ട്രഷറർ എസ്.സാജൻ എന്നിവർ പങ്കെടുത്തു.